Shillong, Nailar 7 : U Myntri ka Tnad Pule Puthi Bah Lahkmen Rymbui ha ka Sngi Thohdieng ula ïathuh ba ka Sorkar Pdeng ka la pyllait ïa ka bhah ba dang sah jong ki nonghikai SSA bad ïa ka tulop u bnai Jymmang, Jylliew bad Naitung yn sa siew noh shen.
Haba kren sha ki nongthoh khubor, u Bah Rymbui ula ong ba ki nonghikai ki la ïoh tang ïa ka bhah ka Jylla naduh u Iaiong namar ba ka slem ka song pisa ka Sorkar Pdeng.
“Nga la kren ïa kane ha ka jingïalang ki Myntri ka kam Pule Puthi ha Delhi myn ha ka 22-23 tarik Naitung. Nga la pyntip ïa ka Sorkar Pdeng ba ha Meghalaya ngi la pyllait tang ïa ka bhah ka Jylla” ong u Bah Rymbui.
U ïathuh ba u Myntri ka Sorkar Pdeng ula kular ba ïa ka song pisa yn sa pyllait noh hapoh ka shitaiew.
“ïa ka pisa la dep ban pyllait sha man ki District. ïa ka bhah ka Sorkar pdeng ba dang pyllait shen jong u bnai Jymmang, Jylliew bad Naitung yn sa siew sha ki nonghikai ha kine ki sngi ban wan” bynrap u Myntri.
