Jowai, Nailar 06: Haduh 38 ngut ki samla ba kynthup ïa 24 ngut ki shynrang bad 14 ngut ki kynthei kila pyndep ïaka jingshah ai hikai kaba 45 sngi, haka 14th Batch na ka jaka ai jinghikai jong ka Muksor Private Security & Services’ (MPSS) kaba don ha Thadmuthlong-C (Phramer) West Jaiñtia Hills District ban long kum ki Security, haka jingïalang leh burom (Pass Out Parade) kaba la long ha kane ka 06.08.2026, ha ka jaka ai jinghikai.
U ma P. Muksor uba long ruh u Managing Director kane ka jaka ai jinghikai, ula ïathuh ba kane ka jingai jinghikai ïa ki samla ka long kum ka jingsdang ïa ka kam ka jam jong ki ha ka liang ka Security, ha kaba nangne kila ïoh shibun ki jinghikai haki rukom kilan met bapher bapher, ka rukom treikam bad ka akor ka burom. Ula ong ruh kine ki samla kiba la dep ban shah hikai kan pynsuk shibun eh ïa ki ban wad ïa ki kam Security nalor ka jingdon jong ki certificate kiba la pynithuh da katei ka jaka hikai MPSS.
U kongsan u bah Banteidor Lyngdoh, haba kren ula ai ka jingïaroh ïa u ma P Muksor uba la don ïa kane ka mynsiem bad ïalam lynti ïa ki khun samla ha ka jingïadei bad ka lad ïoh kam ïoh jam ha kum kane ka pyrthei kyrduh kam kynduh jam, ula kyntu ruh ïa kiba la pass ïa kane ka jingai jinghikai bad kin kiba don burom, ka akor bad ka jingïai shah.
U la ong ba ngin sa leit sha ki tei ki Cement Factory kiba bun ha ri Lum Jaiñtia, ban ïa kren bad ki na ka bynta ba kin ai kam ai jam ïa kine ki samla kiba la pyndep ïa kane ka kam Security Guard, namar kumba long mynta kitei ki factory ki juh pyndonkam ïa ki Security ha ki kharkhna ki jong kiba dei na bar jong ka jylla, da kaba u la ong ruh haba ki don ki briew jong kane ka taiñ kiba la nang ne la tbit ban trei ïa kane ka kam ki dei ban ai shwa ïa ki trai ri. Hynrei pat lada ki kam kiba ki briew jong ngi kim lah ban trei ka dei ïa ki Factory ne ki Company ban wad nongtrei na bar jylla, hynrei haba dang don hi hapoh ka jylla dei ban ai shwa ïa ki trai jylla. Shuh shuh u la ong ba kum kane ka kam Security, ka dei ruh na ka bynta ki ophis, ki Hospital bad kiwei de jaka.
Kiba bun na kiba kren ha kane ka jingïalang ki la ai mynsiem shuh shuh ïa u ma Muksor ba un dang ïaid shaphrang ha kane ka kam bad ban ai ka jinghikai kaba kham bha shuh shuh ïa ki samla kiba thrang ban wan shah hikai ha kane ka Center.
