Nongpoh, Nailar 05: Ka Khasi Students Union (KSU), Umsning Circle, hapoh ka jingïalam u President, Samla Lester Nongbet, ryngkat bad kiwei pat ki nongïalam ka seng, mynta ka sngi ka la leit ban ïakynduh ïa u MLA ka Umsning Constituency, u Dr. Celestine Lyngdoh, ban pynsngew halor ka jingeh kaba mih na ka jingduna ki Doctor ha Community Health Centre (CHC) Umsning.
Ha kane ka jingïakynduh, ka KSU ka la pynpaw ïa ka jingsngewkhia halor ka jingshah ktah jong ki paidbah nongshong shnong ka thaiñ Umsning namar ka jingbym biang ki Doctor ha katei ka jaka sumar. Katkum ka jingïathuh jong ka seng, kane ka jingduna ka la wanrah shibun ki jingeh ïa ki nongpang kiba leit wad jingsumar, bad ha ki katto katne ki khep ka la mih ruh ki jingjia kiba sngewsih namar ka jingbym ïoh ka jingsumar ha ka por kaba biang.
Ka seng ka la ïathuh ruh ba ka la dep ban ïakren bad ki bor ba dei peit ïa ka CHC Umsning hynrei haduh mynta ym pat don ka jingpynbeit kaba shai. Kumta ka la shim ïa ka sienjam ban ïakynduh ïa u MLA khnang ba un tuklar bad rah ïa kane ka mat sha ka sorkar jylla.
Na ka liang u Dr. Celestine Lyngdoh u la pynshai ba kawei na ki daw jong ka jingduna ki Doctor ka long ba katto katne ki la shim shuti ban bteng ïa ki jingpule jong ki, hynrei u la kubur ruh ba ka jylla hi ka dang mad ïa ka jingduna ki Doctor ha kiba bun ki jaka sumar.
Hynrei, ka KSU ka la ong ba kam lah ban pdiang ïa kane kum ka daw, da kaba ban jur ba ka tnad ka koit ka khiah ka dei ban pynbiang ïa ka jingdon ki Doctor khnang ba ka jingshakri ha CHC Umsning kan ym shah ktah bad ki paidbah kin ïoh ïa ka jingsumar kaba paka.
U MLA u la kular ha ka KSU ba un sa ïakren bad tuklar ïa kane ka kam bad u myntri ba khmih ïa ka tnad ka koit ka khiah, khnang ba yn lah ban pynpoi noh ïa ki Doctor kiba donkam ha CHC Umsning.
