Dawa ka KHNAM ban khot da ka tender halor ka jingaiwai ïa ki khyrdop lum khajna ka KHADC

Shillong, Nailar 5 : Ka Khun Hynniewtrep National Awakening Movement (KHNAM) ka dawa ba ka Khasi Hills Autonomous District Council (KHADC) ka dei ban khot da ka tender na ka bynta ban ai wai ki khyrdop lum khajna jongka ym ban shu thoh da ki aplikeshon.
U Working President jongka KHNAM u bah Thomas Passah u la ong ba ka KHNAM ka la pyrshang ban leit ïa kynduh ïa u CEM bah Winston Tony Lyngdoh ha ka Sngi Balang hynrei la bthah ïa ki ban wan noh ha ka Lah Sngi U Blei lane ha ka Sngi Ba Ar.
U la ong ban aiwai ïa ki khyrdop donkam ban ai ki jingpynbna ba shai lyngba ki kot khubor bad khot ruh da ka tender ba kiba kwah thep kin thep namar ka dei kane ka lynti ba long kat kum ka aiñ.
U la ong “ Ka don ka jingïapher kaba khraw bha hapdeng ka jingkhot aplikeshon bad ka jingkhot Tender. Ha ka ri kaba treikam hapoh ki kyndon aiñ, ka dei ka jingkhot tender lane Natice Inviting Tender ngim lah ban pdiang ban shu thoh ne khot da ki aplikeshon kata ruh ban shu wah jingpynbna ha ka Notice Board jongka KHADC”.
U la ïathuh kat kum ka RTI ka KHADC ka la ai wai ïa ki 8 tylli ki khyrdop ha u 2021-22 bad 2022-23, 3 tylli ha u 2024-25, 10 tylli ha u 2025-27 bad 11 tylli ha u 2026-27.
U pynpaw ka jingpyrshah halor ka jingithuh ïa ki khyrdop beaiñ tang da kaba shu pynmih da ka work order bad u ban jur ba dei ban pynduna shuh shuh ïa ki khyrdop lum khajna.
U la ong ruh lada khot da ka open tender kan ïarap ruh ban pynïoh bun ka khajna ne ka jingïoh lum pisa ka KHADC kan kiew bha.
“ Ka KHADC ka dei ban aiwai ïa ki khyrdop sha kiba thep heh ka pisa kumba dei ka rukom bad kan wanrah ka jingïoh nong kaba khraw ïa ka KHADC na kane ka jinglum khajna” ong u bah Passah.