Hadien 29 snem, leit jngoh biang u MLA ka Mawkynrew ïa ka phatok ha Silchar ba u ju shah set kum u dkhot ka HNLC

Shillong, Nailar 4: Ka jingleit jngoh biang u MLA ka Mawkynrew Constituency, u Bah Banteidor Lyngdoh, uba tip paidbah kum u Bah Pai, ïa ka phatok ha Silchar, Assam, ka la wan biang ka jingkynmaw sha kawei na ki bynta kaba eh tam ha ka jingim jong u. Hadien 29 snem naduh ba u la ju shah set ha katei ka phatok hapoh ka National Security Act (NSA), mynta pat u la wan jngoh biang ïa katei ka jaka kum u nongmihkhmat paidbah ba la shah jied da ki paidbah.
U Bah Pai u la leit sha Silchar ha ka 17 tarik Naitung 2026 ban pyndep ïa ki kam jong ka Presbyterian Church of India (PCI). Hadien ba la pyndep ïa ki kam, u la shim ïa ka kabu ban leit jngoh biang ïa ka phatok kaba u la ju pynlut kumba shisnem tam ha ka por ba u shah kem kum u dkhot ka Hynniewtrep National Liberation Council (HNLC).
Haba u la poi ha katei ka phatok, u Jail Superintendent bad ki ophisar ka thanat along ki la lyngngoh ban tip ba u nongwan jngoh u dei u MLA uba la ju shah set ha katei ka phatok. Hadien ba u la ïathuh ïa ka jingïaid lynti jong u, ki la ïakren bad ïasyllok halor ki jingkylla kiba la wan ha ka jingim jong u naduh ka por ba u shah set haduh ba u la shah jied kum u nongmihkhmat paidbah.
Ha ka jingïakren bad ki ophisar, u Bah Pai u la kynmaw ïa ka jingshit kaba jur ha Silchar bad ïa ki jingeh kiba u la mad ha ka por ba u don hapoh phatok. U la ong ba ka jingwan peit biang jong u ïa katei ka jaka hadien bun snem ka la pynlong ïa u ban kynmaw ïa ki jingïaid lynti kiba eh tam ha ka jingim jong u.
Katkum ka jingïathuh jong u Bah Pai, u la pynïasoh ïalade bad ka Hynniewtrep National Liberation Council (HNLC) ha ki bnai tlang jong u snem 1992. Ha u snem 1993, u la ïarap borbah ïa ka seng, bad ha u snem 1994 u la leit shah pyntbit shisnem kynthih sha Myanmar ryngkat bad ka kynhun NSCN-IM kum u dkhot jong ka batch kaba ar jong ka HNLC. U la ong ba ha kito ki snem, kiba bun ki samla Khasi ki dap da ka mynsiem ieit ri bad ieit jaidbynriew, bad dei ha kane ka jingngeit ba ma u ruh u la rai ban pynïasoh ïalade bad katei ka seng.
Hadien ba la dep ka jingpynbit, u la trei na bynta ka bha ka miat jong ka seng hynrei ha u snem 1997 u la shah kem noh bad la pynngat ïa u hapoh ka National Security Act. La rah ïa u sha ka phatok ha Silchar, bad hadien kumba shisnem tam la pynkynriah biang ïa u sha Shillong. Hadien ba u la pynlut jan ar snem hapoh along, u la lait noh ha u snem 1999.
U Bah Pai u la shah kem biang ha u snem 2000 hadien ba la shah pharep bad shah kynnoh da ki pulit ba u dang ïadon bynta bad ka seng. Ha ka por ba u shah tohkit, la pynshitom jur ïa u da ka jingthmu ban pynphla ba u dang ïadonkti bad ka HNLC. Hynrei namar ba um ïadon bynta shuh bad ka seng, ki pulit kim shym la lap ïa kino kino ki sakhi kiba biang ban pynngat ïa u ha ki kyndon aiñ, bad hadien katto katne bnai la pyllait noh ïa u.
Ha u snem 2002, u Bah Pai u la shah kem biang, hynrei hadien shibnai la pyllait noh ïa u. Watla u la shah kem haduh lai sien ruh, kine kiei kiei kim shym la pynduh mynsiem ïa u. U pynlut ïa ka por jong u sha ka imlang sahlang bad ïai bteng ban trei shitom bad ban noh synñiang ha ki kam kiba wanrah ïa ka bha ka miat ha shnong ha thaw.
U Bah Pai u la ïathuh ruh ba um shym la surrender, hynrei hadien ba u la lait na phatok u la ïakren bad ka seng bad pynsngew ba um lah shuh ban bteng namar ka jingkitkhlieh kaba jur ïa la ka ïing ka sem. Naduh kata ka por u la rai ban phai noh sha ka imlang sahlang bad ban trei shitom ban kyrshan ïa la ka longïing.
Ka jingduk ha ïing ka la pynlong ïa u Bah Pai ban sdang bylla naduh dang rit. Katba u dang leit skul, u hap ruh ban leit bylla sngi ban ïarap ïa la ka kmie bad ban kyrshan ïa ka ïing ka sem. U la trei ha ki kam bapher bapher, naduh ka jingïarap ha ïew, ha ki karkhana shna synduk tin bad ki kam bylla sngi ha ki jaka shna ïing.
Haba phai sha ki snem ba u dang rit, u Bah Pai u dei ruh uba ieid bha ïa ka jingïalehkai football. U la sdang ban ïalehkai bad mihkhmat ïa ka kynhun Under-16 jong ka Langsning ha ka lympung Catch ’em Young kaba la pynïaid da ka Seng Samla Jaiaw Langsning bad kham hadien u la mihkhmat na ki kynhun Mait Shaphrang bad Tia Chaphrang. Wat hapdeng ka jingduk bad ki jingeh jong ka jingim, um shym la iehnoh ïa ka jingïalehkai football. Hadien ba u la mih na phatok, u la ïalehkai biang na ka Lumdiengjri Sports Club bad u la noh synñiang ban pynpoi ïa ka kynhun sha ka Super Division.
Da ka jingtrei shitom bad jingïaishah, u Bah Pai u la nang kiew ha ka kam bad u la sdang ïa ki kam kum u kontraktor. U la ong ba dei lyngba ka jingïaishah bad ka jingïakyrshan na kiba ieit ba thoiñ ba u la lah ban pynbiang ïa ka ïing ka sem bad noh synñiang sha ki kam jong ka imlang sahlang.
Naduh ba u la lait na phatok ha u snem 1999, u la im ka jingim ba ïadei bad ka imlang sahlang bad sdang ban trei na ka bynta ki kam paidbah. U la ong ba hadien ba u la ïaid lyngba ïa shibun ki jingeh, u la sngewthuh ba ka jingïakhun da ki ktang suloi kam lah shuh ban wanrah ïa ka jingkylla kaba u angnud. Kumta u la rai ban rung sha ka saiñ pyrthei, da kaba ngeit ba lyngba ka Ïing Dorbar Thawaiñ yn lah ban ïasaid bad ban wanrah ïa ki mat kiba ktah ïa ka ri bad ka jaidbynriew.
Ha u snem 2013 u la ïakhun ïa ka elekshon kum u Independent hynrei u la shah rem tang khyndiat. Ha u snem 2014 pat u la shah jied kum u MDC na ka Indian National Congress bad long Executive Member jong ka Khasi Hills Autonomous District Council (KHADC) bad lyngba kane ka lad u la ïoh ban shakri hok ïa ki paidbah ym tang ïa ki paid ka Mawkynrew Constituency hynrei wat ïa ki paid jongka ri lum Khasi bad Jaintia.
Ha u snem 2018, ki paidbah ka Mawkynrew Constituency ki la jied ïa u kum u MLA na ka People’s Democratic Front (PDF), bad u la long ruh u Myntri Sorkar jylla uba peit ïa ka Sports & Youth Affairs bad Agriculture. Ha ka elekshon 2023, ki paidbah ki la pynpaw biang ïa ka jingshaniah da kaba jied biang ïa u kum u MLA.
Ha ka por ba wan ka khlam COVID-19, u Bah Pai bad i kurim jong u, i Kongrit, ki la shim bynta shitrhem ban ai jingïarap ïa ki paidbah. Kumjuh u khun jong ki, u Bankit, u la ïadon ryngkat ban ai mynsiem bad ïarap ïa ki longïing kiba shah ktah ha ka khlam. U Bah Pai u la trei borbah ban pynïoh Interstate Pass ïa ki nongrep bad ki nongkhaïi, pynpoi ïa ki samla pule ba wanphai na shabar jylla sha la ïing bad pynbiang ïa ki jaka quarantine. U bad i Kongrit ki ju leit ruh sha ki hospital ban ai mynsiem ïa ki nongpang COVID bad ki bahaïing jong ki. Haba don kiba khlad na ka jingpang COVID-19, u Bah Pai u la leit hi ban kit ïa ka met na hospital bad synran ïa ka shaduh jaka tep.
Ha baroh katei ka jingïaid lynti, ka jingïadon ryngkat jong i kurim jong u, i Kongrit, ka la long kawei na ki bynta kiba kongsan. Naduh ki por kiba eh tam jong ka jingim haduh ba u la poi sha kane ka kyrdan, i la don ha syndah jong u da kaba ai mynsiem bad jingkyrshan ha man ka sienjam jong ka jingïaid lynti jong u. Ka jingïasngewthuh jingmut bad ka jingïatylli jong ki ka la nang pynskhem ïa ka jingangnud jong u ban shakri ïa ki paidbah bad ïa ka jylla.
Ka jingwan poi jong u Bah Pai ban khongoid ïa ka phatok ha Silchar hadien 29 snem kam dei tang ka jingjngoh ïa ka jaka kaba u ju shah set, hynrei ka pynpaw ruh ïa ka jingïapher kaba khraw hapdeng ka mynnor bad ka mynta. Na u samla uba la mad ïa ka jingduk, ka jingjynjar bad ka jingshah set phatok, mynta u la long u nongmihkhmat paidbah uba la shah jied da ki paidbah ban shakri ïa ka Mawkynrew Constituency bad ïa ka jylla.
Hadien 29 snem, ki kynroh bad ki jingkhang-nar jong katei ka phatok kiba ju khang ïa u mynshwa ki la sakhi pat ïa ka jingwan jong u ym shuh kum u koidi, hynrei kum u MLA. Ka jingïaid lynti jong u na ka along sha ka Ïing Dorbar Thawaiñ ka long ka sakhi ba wat hapdeng ki jingeh bad ki jingïaleh kiba khraw tam, ka jingtrei shitom, ka jingïaishah bad ka jingaiti ha ka jingshakri paidbah ki lah ban pynkylla ïa ka jingim bad ban plie ïa ka lynti kaba thymmai.