Ïoh ka jylla 336.62 klur na bynta ka JJM, kynduh markhmat u Myntri PHE ïa u Myntri Jal Shakti

Shillong, Nailar 04 : U Myntri ka tnad PHE ka Sorkar Jylla u Marcuise N Marak ha ka sngi Ba-ar u la ïakynduh ïa u Myntr ka tnad Jalk Shakti jong ka Sorkar Pdeng u CR Patil ban pynpaw ïa ka jingsngewnguh halor ka jingmynjur ïa ka song pisa kaba 336.62 klur na ka bynta ka snem pisa 2026-27, hapoh ka JJM 2.0.
“Ha ka jingïakynduh ïa u Myntri Jal Shakti u CR Patil Ji, nga la pynpaw ïa ka jingsngewnguh kaba khraw halor ka jingmynjur ban ai 336.62 klur na ka bynta ka JJM 2.0 jong u snem 2026-27,” ong u Marcuise ha ka kyrwoh sha ki lad pathai khubor.
U Myntri u la ong ba kane ka pisa kan ïarap ïa ka Meghalaya ban pyntreikam ïa ka JJM 2.0 bad ban siew ïa kumba shi bynta na ki lai bynta jong ki bill kiba dang sah jong ki kontraktor ka JJM.
“Ïa kiwei pat ki bynta jong ka pisa ba dang sah yn sa pyllait ha ka por kaba biang, khnang ban pynthikna ba ka Mission kan ïaid beit bad pyndep ïa ki kam ha ka por kaba biang,” u la bynrap shuh shuh.
Shuh shuh u la ïathuh ba ka Meghalaya ka la ïoh ïa ka jingïaroh haba ïadei bad ki sienjam ban pynneh pynsah ïa ka JJM, bad ki jingtrei kiba dang bteng ban pynthikna ïa ka umbam kaba shngaiñ bad kaba khuid.
U Myntri u la pan ruh ïa ka jingïarap bad jingkyrshan jong u Myntri ka Sorkar Pdeng na ka bynta ka Resubelpara Water Supply Scheme, kaba thmu ban pynthikna ïa ka umbam kaba shngaiñ, khuid bad neh slem na ka bynta ki paidbah ka Resubelpara.