Dei ka jinglaitlan ki sñiang ba nabar ba roi ka jingpang bad ïap khlam ki sñiang, ka sorkar ka dei ban map ïa ki ram

Nongpoh, Nailar 04: Tang hadien shi sngi ba la paw paidbah ha ki lad pathai khubor halor ka jingkynnoh ba don ka jinglum pisa na ki kali kit jingri kiba wan na shabar jylla ban ioh rung beit (Direct Entry) sha Meghalaya, da kaba siew pisa, ki nongri jingri na ka them Ri-Bhoi ki la mih shakhmat ban pynpaw ïa ka jingsngewsih bad ka jingduh jingkyrmen kaba khraw.
Kane ka jingmih jong ki ka long hadien ba bun ki jingri jong ki la iap na ka jingsaphriang jong ka khlam. Ki la kynnoh ba ka jingwan rung laitlan jong ki jingri na shabar jylla khlem ka jingpeitngor kaba bñiah ïa ka koit ka khiah ka lah ban long kawei na ki daw kiba pynsaphriang ïa kane ka jingpang.
Haba kren sha ki lad pathai khubor, u Bah Baisroy Lyngdoh Mawnai na Shangbangla, u Bah Micheal M. Suting na Nonglyngdoh, u Bah Samuel Hing, ka Kong Baiakmenlang Syngkli bad ka Kong Milinda Jyrwa na Bhoirymbong, ryngkat bad kiwei pat ki nongri jingri, ki la batai shaphang ki jingeh kiba ki la mad.
Ki la ong ba lyngba ka Piggery Mission, ka sorkar ka la kyrshan ïa ki da kaba ai jingïarap bad ram ban kyntiew ïa ka kam ri sniang. Hynrei, hadien ba mih ki jingkynnoh halor ka jinglum khajna ban pynrung ïa ki jingri na shabar jylla, ki sngew ba ka jingïada ïa ka kam jong ki nongri ka la duna, katba ma ki pat ki dang kit ïa ka jingkitkhlieh ban siew ïa ki ram.
Ki la ïathuh ruh ba ha ka por ba ki sdang ïa ka kam ri sniang, ki la don ka jingkyrmen ban pynim ïa ka ïing ka sem. Hynrei, hadien ba ka khlam ka la lynshop ïa ki jingri jong ki, bun ki la duh da ki phew lak tyngka, kaba la wanrah ïa ka jingeh kaba khraw bad ka jingbynñiaw.
Namar kata, ki la kyrpad ïa ka Sorkar ba kan pynkhlaiñ ïa ka jingpeitngor ha ki khyrdop jylla ban khmih bñiah ïa ka koit ka khiah jong ki jingri kiba wan na shabar. Nalor kata, ki la dawa ruh ba dei ban map noh ïa ki ram jong ki bad ban ai jingïarap pisa halor ka jingduh kaba ki la mad na ka jingïap jong ki sniang.
Ha kajuh ka por, ki nongri jingri ki la pynpaw ïa ka jingkyrmen daka jingshimkhia jong ka Hills Farmers Union (HFU), ban ïada ïa ka bha ka miat jong ki nongri jingri bad ban pyrshah ïa kino kino ki jingpyrshang ban ailad rung ïa ki jingri na shabar jylla tang da kaba siew pisa khlem da bud ïa ki kyndon ban peitngor ïa ka koit ka khiah jong ki mrad.