Shillong, Nailar 3 : U Symbud Myntri Rangbah ka jylla u Ma Sniawbhalang Dhar ha ka sngi Nyngkong ula pynpaw ïa ka jingsngewlem halor ka jingshlei um kaba ka jia ha jylla Assam bad ula ong ba ka Sorkar Meghalaya ka la long kaba kloi ban ïakynduh ïa ka Sorkar Assam ban pynbeit ïa kano kano ka mat da ka jingïatreilang.
“Ka long kaei kaei kaba sngewsih khamtam ïa kaei kaba jia ha Assam. Kane ka la ktah jur ïa ki paidbah bad nga phah ïa ka jingsngewlem sha kito kiba la duh noh ïa la ki jingim” ong u Ma Sniawbha haba ïakren bad ki nongthoh khubor.
U Symbud Myntri Rangbah ula ong ba ula dep kren ïa u Myntri Rangbah ba dei ban pynlong noh mardor ïa ka jingïalang bad u Myntri Rangbah ka Assam. “Nga lah dep ong ïa u Myntri Rangbah ba ngin ïakynduh ïa u Myntri Rangbah ka Assam.
Ngin ïakren bad ngin ïa pynbeit lang. Ngim don hangne ban ïa kynnoh iwei ïa iwei pat. Ngi don hangne ban trei na ka bynta ki paidbah” ula ong.
U Ma Sniawbha ula banjur ba baroh ar ki sorkar ki don ïa ka histori ban ïa shimkhia lang ïa ki jingeh khamtam ïa kito kiba ïadei bad ki lad pynïasoh ha ka leit ka wan.
“Nga kren shai ba lada ka don kano kano ka jingeh ha ki surok ne surokbah, ngi kum ka sorkar ne baroh ar ki sorkar, ngin ïa pynbeit lang. Kam don kano kano ka jingeh” ula bynrap.
Halor ka jingkylli hato katei ka jingïalang kaba la tyrwa, u Ma Sniawbha ula ong ba ka jingïakren kan long ha ka rukom kaba biang ban wad ïa ki lad ki lynti kiba biang tam ban ïaid shakhmat.
“Baroh ar ngin sa ïakynduh bad ngin sa ïakren ha ka rukom kaba biang. Ngin pyrshang ban wad ïa ki lad kiba biang tam. Ngi lah long kiba kloi ban leh ïa katei” ula ong.
