Haduh 58 % duna ka jingïoh slap ka Meghalaya, ap ka jingma naduh ka bording, ka umdih bad ka rep ka riang

Shillong, Nailar 2: Ka Jylla Meghalaya, kaba la tip kum ka jaka kaba kaba ju ïoh bun bha ïa u slap ha ka pyrthei, hynrei ka la sakhi ïa ka jingïoh duna bha ïa u slap mynta u snem, ha kaba ka jylla ka la ïoh ïa ka rekod kaba duna haduh 58% u slap hapdeng jong ka 1 tarik u Jylliew haduh ka 31 tarik u Naitung, katkum ka jingpynbna kaba la pynmih da ka India Meteorological Department (IMD).
Ka jylla ka la ïoh pdiang ïa u slap uba 681.5 mm kaba long pyrshah ïa kaei kaba ju ïoh baroh shi katta kaba long 1,626.2 mm, kaba la buh ïa ka Meghalaya ha ka kyrdan jong ka jingïoh duna ïa u slap.
Ka jinglong jingman ka long kaba sngewkhia bha thik na ka bynta u Naitung. Ka jylla kala ïoh pdiang tang 3.4 mm u slap kaba long pyrshah ïa ka jingïoh slap kaba baroh shi katta kaba long 20.1 mm, ka jingduna kaba la kot haduh 83% ïa kaba la shim ka dei ka jingduna kaba khraw bha.
Kane ka jingduna slap ka dei kaba la jia ha kylleng jong ka jylla, ha kaba 10 tylli na ki 11 tylli ki district jong ka Meghalaya ki la ïoh pdiang duna bha ïa u slap kaba la ïapher bak ly bak na ki por kiba la leit.
Napdeng ki district kiba la shah ktah jur: West Jaintia Hills: Ka jingduna slap ka long haduh 78%.
West Khasi Hills: Ka jingduna slap kala kot ïa ka 71%
West Garo Hills: Ka jingduna slap ka long 69%
East Jaintia Hills: Ka jingduna slap kala kot ïa ka 67%
North Garo Hills: Ka jingduna slap ka long 64%
East Garo Hills: Ka jingduna slap ka long 59%
South West Garo Hills: Ka jingduna slap ka long 54%
East Khasi Hills: Ka jingduna slap kala kot 50%
South Garo Hills: Ka jingduna slap ka long 50%
Ri Bhoi: Ka jingduna slap ka long 46%
Ka South West Khasi Hills ka la ïoh pdiang haduh 1,917.8 mm u slap kaba la long palat ban ïa kaba ju ïoh ïa u slap uba 1,049.5 mm bad kane ka la lam sha ka jingïoh kyrhai kaba 83% bad kane ka la pynlong ban don ha ka kyrdan kum kaba ïoh pahuh bha ïa u slap.
Kine ki jingtip ki banjur ba ka la don ka jingbym ryntih ka rukom ïoh slap hapoh ka jylla Meghalaya ha kane ka aiom lyiur kaba mynta.
Watla kiba bun ki jaka jong ka jylla ki la sakhi ïa ka jingjur u slap, hynrei ka jinglong jingman ha baroh kawei ka rukom slap ka la long kaba duna bha ban ïa kaba ju slap baroh shi katta, kane ka la pynsngewkhia ïa ka jingdon jong ka um, ka rep ka riang, ka jingkiew um ha ki jaka pynlang um, lada jia ba kane ka jingbym ïoh slap kan dang bteng ha kine ki taiew ki ban dang wan.
Ka IMD, ka la batai lypa ba kan sa don ka jingslap bha ha ka thaiñ shatei lam mihngi jong ka ri ha u Nailar, ka ban ai jingkyrmen ba ka jingduna slap ka lah ban hiar noh ha kine ki por kiba dang sah jong ka aiom synrai.