Na ka bhah khajna jong ka jylla ailypa ka Sorkar Pdeng 688 klur tyngka ban pyntrei ïa ki kam pynroi

Shillong, Nailar 02 : Ka Meghalaya kala ioh T.688 klur kum shibynta na ka jingai lypa ïa ka bhah khajna bala pyllait da ka Sorkar Pdeng ban ïarap ïa ki Jylla ba kin pynsted ïa ki capital project (jingai pisa ban kynshew sha ki jingdon jingem ne jingtei kiba kongsan) bad ka jingpynlut ha ki kam pynroi pynpar.
Ka Ministry of Finance ha ka sngi Saitjain kala pyllait T.1, 09, 019 klur sha baroh ki Jylla kum ka instalment bynrap, kaba kham bun ban ïa ka jingai bhah khajna ba man u bnai kaba la dei ban ai ha ka 10 tarik Nailar.Ka Sorkar Pdeng ka ong ba kane ka jingpyllait lypa ïa ka khajna ka thmu ban pynkhlain ïa ka pla tyngka ka Jylla bad pynlah ïa ka Sorkar ba kan pyntrei sted ïa ki jingtei bad pyntreikam ia ki prokram ba ïadei bad ka bha ka miat.
Napdeng ki Jylla ka thain Shatei Lam Mihngi, ka Assam kala ioh bun eh ïa ka bhah kaba kot T.3, 552 klur, bud sa ka Arunachal Pradesh-T.1,476 klur.Ka Meghalaya ka ioh T.688 klur, kaba duna khyndiat ïa ka Tripura-T.699 klur hynrei kham heh ïa ka Manipur -T.682 klur, Mizoram-T.615 klur, Nagaland-T.524 klur bad Sikkim-T.365 klur.
Kane ka jingpyllait lypa ïa ka khajna la khmih lynti ba kan plie ka lad ïa ka Meghalaya ba kan pyniaid shakhmat ïa ki project jingtei, ki lad pyniasoh sha ki jaka kyndong, ka pule dangle, ka koit ka khiah bad kiwei ki kam pynroi khlem da ap ïa ka jingsam bhah haduh ka 10 tarik Nailar.