Nongstoiñ, Nailar 02: Ka jingsumar ïa kiba pangba shitom da ki dawai kynbat ka dei ka sap ba kyrpang kaba ki Khasi Pnar ki la don naduh hyndai hynthai bad katba nangïaid ki snem ki nongshong shnong kiba don ïa ka sap ha katei ka kam ki nang ïaksaid bad ïaleh katba lah ban kyntiew shaphrang na ka bynta ka jingmytoi jong ki paitbah bad ki ba pang ba shitom.
Ha kine ki khyndiat sngi ba la dep hadien ba la ïoh jingtip ba u don uwei u rangbah uba la tip kyrteng um u bah Hopestar Paliar ha ka shnong Rambrai West Khasi hills uba ju sumar ïa kiba pang ba shitom tang da ki dawai kynbat Khasi paka u nongthoh khubor jong u Mawphor u la hiar sha katei ka shnong ban ïakynduh ïa u.
Haba la poi ha kajaka sumar jon utei u rangbah la lap ba ki don shibun ki nongpang ba kynthup ïa ki rangbah, ki longkmie, ki samla bad ki khynnah kiba wan ban phah sumar ha katei ka jaka.
Nalor kata la lap ruh ba ki nongïalam jong ka Synjuk Ki Nongai Dawai Khasi Nylla ki don ha katei ka jaka sumar ban ïakynduh ïa u na ka bynta ki kam kiba don kam jong ka Synjuk.
Ha katei ka sngi la ïoh ban ïakren bad ki nongpang kiba wan ban phah sumar ha kaba ki la ïathuh ba hadien ba ki la ïoh jingshitom ki la leit ban phah sumar ha ki jaka sumar jong ka sorkar ha kylleng ki jaka hynrei kim shym la koit satia bad ki la hap ban wan phai noh sha shnong bad ki la pyrshang ban leit pah sumar noh hautei u rangbah ha kaba ki la ïoh jingkoit.
Nalor kata ki don ruh kiba la dkut shyieng ha ka por ba ki ïalehkai bad ki la wan ban phah sumar ha u ha kaba tang katto kate por ki la koit la khiah bad ka shyiengkaba la dkut ka la bha biang kumba ka long.Nalor kata don ruh uwei u rangbah uba shah puh bseiñ ha kaba u la shitom jur bha hynrei naduh ba u la sdang ban wanphah sumar ha utei u rangbah mynta u la koit la khiah bha.
Ha kaba ïadei bad ka kam sumar pang jong utei u rangbah la ïoh ban ïakren bniah bha bad u ha kaba u la ïathuh ba u kpa jong u u dei u nongsumar pang uba tbit bha ha kaba u ju sumar tang da ki dawai kynbat bad naduh ba u dang rit u kpa u ju ïalam ïa u sha khlaw man ka por ba u leit ban wad ïa ki kynbat dawai.
Shuh shuh u la ïathuh ba u kpa jong u u ju batai ruh ïa ki kyrteng bad ki jait kynbat kiba ïadei bad ki jait jingpang bapher bapher ba kynthup ruh ïa ki jait jingpang kiba kylla na ka jingshah puh bseiñ, dait ki kynja mrad, kheiñ shyieng, bad kiwei kiwei.
Utei u rangbah u la ïathuh ruh ba haba ki nongpang ki wan ban pah sumar ha u lada u lap ba udei u ‘ñiang soh ot u ju phah noh wut wut sha ki hospital sorkar bad ha ki doctor sorkar kiba la dep pyntbit ha ka jing sumar pang hynrei ïa kiwei kiwei ki jait jinshitom kat kiba u lah ban pynkoit u hap ban sumar hi.
Haba pyrshang ban kylli ba ïa mki jait kynbat dawai u shu thied na kiwei ne u leit kheit hi na khlaw utei u rangbah u la ong ba ki don ki jait kynbat dawai kiba u shu phut na khlaw bad u rep ha kper.
Nalor kata u la on ruh ba ki don tang katto katne ki jait kynbat ki bym don ha ki jaka jong ka thaiñ kiba u hap ban shu thied na kiwei pat. Shuh shuh u la ong ba ha ki por mynshuwa haba ki khlaw ki btab ki dang rben bha da ki spah jait ki kynbat dawai lah ban ïoh na khlaw hynrei na ka daw jong ka jingpom pathar ïa ki khlaw, ka jinwiang ding pathar ha ki aïom ba rang ryngkhiang ka jin don jong ki kynbat dawai ka la duna haduh katta katta.
U la ong ruh ba lada ki paitbah nong shong shnong ki la nang ban burom ïa ka mariang da kaba kiar na ka jingpom pathar ïa ki khlaw, ka jingwiang ding pathar ïa ki lum ka don kajingkyrmen ba ki jait kynbat dawai kin dang roi biang hynrei lada ka jingpom pathar ïa ki khlaw bad ka jing wiangding pathar kan dang bteng kan sa poi ka por ba ki kynbat dawai kin duh jait syndon namar ki don ki jait kynbat kiba kordor haduh katta katta hynrei shisien ba la jliah ka thylliej ding pathar kim lah shuh ban mih hynrei ki duh jait noh.
Khatduh eh u la kyntu ïa ki paitbah nongshong shnong ba kin burom ïa ka mairiang bad ki jingdon jngem kiba u Blei u la buh kyrpang na ka bynta ban pynlong kum ki dawai bah ban pynkoit ïa ki jingpang ba bun jait.
