Sha u DC pyntip ki sengbhalang ïa ka jingsniew network Jio bad ba sniew bording ha Rongara

Baghmara, Nailar 02: Ar tylli ki jingeh jong ki paidbah kiba la slem bha ha ka thaiñ Rongara-Moheshkhola-ka jingbym lah ban pynïasoh ïa ki mobile Jio bad ka jingpynbiang bording kaba khlem thikna ryngkat bad ka jingduna bording kaba jur ha ka jaka pynmih bording ha Rongara-la wanrah sha ka jingtip jong u Deputy Commissioner jong ka South Garo Hills da ki seng bhalang kiba don ha ka thaiñ.
Ïa ka dorkhas la aiti da ki nongmihkhmat jong ka seng A’chik Progressive Association (APA), ka Federation of Khasi Jaintia and Garo People (FKJGP), ka Garo Hills Youth Society (GHYS) bad ka Garo Students’ Union (GSU).
Ha ka dorkhas ba nyngkong, ki seng ki la ong ba ki nongshong shnong jong ka Rongara, Mahadeo bad Moheshkhola kiba hap hapoh ka Rongara Development Block ki la ïakhun pyrshah ïa ka jingduna ka jingpynïasoh Jio la slem bha.
Katkum ka jingong jong ki, ka jingkhlain jong ka signal kaba tlot, ka jingjah ka jah por ba kren phone man ka por, ka jingbym skhem ka jingpyniasoh internet bad ka jingsuki jong ka data ka la pynthut shi katdei ia ka jinghikai online, ka jingsiew digital, ki kam khaii bad ka jingiakren ba man ka sngi.
Ki seng ki la ong ba ka jingap ia ka network ban ioh kam shym la ai jingmyntoi ei ei bad ki la kyntu ia ka bor synshar district ban pynsngew sha ka Jio ban kyntiew kyrdan bad pynbha ia ki jingtei jong ka network bad ban pynbha ia ka jingshakri ha ka thain ha ka por kaba kloi tam.La phah ruh ia ka kopi jong kane ka dorkhas sha u Customer Relation Manager jong ka Jio Telecom ha Tura.
Ha ka dorkhas la ka jong, ki seng ki la pynpaw ïa ka jingpynlip bording kaba ju jia man ka por bad ka jingduna kaba jur jong ki nongtrei ba tbit ha ka jaka pynmih bording ha Rongara.
Ki la ong ba ka jinglip bording kaba ju jia man ka por ka la ktah ia ki ïing ki sem, ki skul, ki jaka sumar, ki kam khaïi bad kiwei kiwei ki jingshakri kiba kongsan, katba ka jingduna bording ka la pynslem ia ki kam maramot bad ban pynioh biang ia ka bording ha ka por ba don ka jingthut.
Da kaba kdewïa ka jingbun ki nongpyndonkam bad ka jingbun ki kam ha ka substation, ki seng ki la dawa ban phah mardor ïa ki nongtrei linemen bad ki nongtrei ba tbit.Ki la dawa ruh ïa ki lad ki lynti ban pynbha ia ka jingshaniah jong ka jingpynbiang bording bad ban pynkhlain ia ki rukom iarap kyrkieh ban pynthikna ia ka jingpynbha pat kloi ha ka por ba duh bording.