Jowai, Naitung 31: Ka Jaiñtia Students Movement (JSM) ka pynpaw ka jingsngewsih kaba jur bad ka jingpyrshah halor ka jingshah kem be-aiñ ki 4 ngut ki nongïalam ka Jaiñtia National Council (JNC) da ki pulit ha ka 30/07/2026 ha Sutnga Elaka.
Kine ki nongïalam ki la shah kem haba ki dang leit ban ai mynsien ïa ki paidbah ka shnong Daistong ban pyrshah ïa ka Public Hearing ka Shree Cement kaba la pynbna ban long ha ka 31 tarik.
Kitei ki nongïalam kiba la shahkem ki kynthup ïa u Sambormi Lyngdoh- President, JNC, u Wanshwa Suting – General Secretary, u Allmiki Ryngkhem- Assistant Secretary bad u Hillarius Siangshai – Executive Member ka JNC.
Ka JSM ka ong ba kane ka jingleh ka dei ka jingpyrshah ïa ka hok democracy jong ki paidbah. Ka dei ka jingthreat ban pyrshah ïa ki nongïaleh ba pyrshah ïa ki project ka Shree Cement.
Kumta ka JSM ka dawa jur na ka Sorkar lane bor District ka East Jaiñtia Hills District ban pynlait noh mardor bad weng noh ïa baroh ki case khlem da buh kano kano ka kyndon pyrshah ïa ki 4 ngut ki nongïalam ka JNC.
Lada ka bor District kam pynlait ïa ki nongïalam ka JNC hapoh 24 kynta, ka JSM kan pynlong ka jingïakhih ba jur ban dawa ïa pynlait ïa ki. Pynkut ka kyrwoh na u Publicity Secretary samla Heihokmi Sapuh.
