Nga donbok ba ngam pat ju dih kyiad bad nga pynlut bun ka por ha ka kilan met: John Abraham

Shillong, Naitung 31: U Adviser ka Tnat Social Welfare ka Sorkar jylla u Bah Paul Lyngdoh u la ong ba ka jylla Meghalaya ha kine ki 10 snem ba la leit ka wan ka jingkylla dur na kawei ka pateng sha kawei pat.
U la ong haba phai sha ka kam jngohkai pyrthei, ka kam ïalehkai sports, ka jingdon ki nongshong shnong kiba don sap kyrpang bad kumjuh ruh ka jingkiew ha ka pule puthi, ka Meghalaya ka la kiew bha.
Ïa kane u la ong kum u kongsan ha ka prokram pynsngewthuh paidbah kumno ban ïakhun pyrshah ïa u drok ha ka jylla halor ka phang ‘Pulse of the hills: Every Beat Against Drug’ ba la pynlong ha State Guest House Taraghar Shillong.
Katba u nongshah khot kyrpang u Actor ka Bollywood u John Abraham uba dei ruh u Co-Owner ka North East FC u la pynpaw ïa ka jingieid jong u ïa ka Shillong bad ka thaiñ shatei lammihngi.
U la ong ba u long uba donbok ba um pat ju dih ïa ka kiad, ban pyndonkam ïa u drok bad kiwei kiwei ki jingmlien ba sniew, hynrei u la ïai pynneh ïa la ka met kaba koit ba Khiah lyngba ki kilan met kum ka jingniah bycycle, ka jingïaleh kai phutbol bad kiwei kiwei.
U la ong ban lait na ki kam bad ki jingmlien ba sniew dei ban pyndonkam bha ïa ka bor pyrkhat ban sngap ïa kaba bha bad ban bret noh ïa kaba sniew.
Ha kane ka prokram la pdiang sngewbha ïa baroh da ka Director ka Social Welfare ka Saloni Verma, IAS, bad la ai khublei da u Chairman ka DREAM u Bah F Kharshiiing.
La don ki jingrwai na u Kitkupar Nongseij bad ka jingshad na ka kynhun Zumba.
Nangta ka la don ka jingailad ïa ki nongïashim bynta ban buh ki jingkylli ha kaba u Bah Paul bad u John A Abraham ki la ïoh ban ai ki jubab, bud sa ka jingïasoi kyrteng, ka jingpynlait ïa ka kali Dream Mission, Asha Bhavan Rehabilitation centre Tura da u kongsan bad kiwei kiwei pat ki prokram.
Ha kane ka sngi u Actor ka Bollywood u John Abraham u la pynsngew bha ïa ka prokram Anti drug Awareness programme da kaba iashad lang bad ka nongseng ka Zumba music bad exercise class ka Zin Pale Warjri ha ka prokram ha State Guest House Taraghar, Shillong, ka prokram ba la pynbeit da ka Tnat Social Welfare.
Ha kane ka prokram u Kitkupar Nongseij pat u la rwai sngewtynnad da ki jingrwai kiba sneng halor ka jingdonkam ban kylla na kaba sniew sha kaba bha bad la don ruh ka jingkren na uwei na ki rangbah uba la lait na ka jingshah teh shah khum ha u drok lyngba ki jingshah sumar ïa kiba dih drok.