Shah thombor ka longïing ha u runar, ïap u rangbah ba la 60 snem jahrngai ka khun khatduh

Nongstoiñ, Naitung 31: Ha ka step jong ka sngi thohdieng kawei ka jingjia kaba la pynher syrngiew ïa baroh ha kaba uwei u rangbah u la duhnoh ïa la ka jingim, hadien ba u la shah pynïap dusmon da kaba shah pom da ka wait na ki bynta jong ka khlieh, kaba la jïa ha ïing sah jong u kaba don ha ka shnong Mawrok Porsohsat West Khasi Hills.
Katkum ka jingïathuh jong u sordar jong ka shnong Bah Pynroilang Nongsiej, u la ong ba la antad ba kane ka jingjia ka la jia ha ka step synñia jong ka sngi thohdieng, ha kaba na ka liang jong u ruh u la ïoh jingtip sa ha ka por 2 baje ei ei mynstep.
U sordar u la ïathuh ba u rangbah u ba la shah pom bad ba la khlad noh la u dei u kpa jong ka ïing ba la tip kyrteng u Bah Elbin Kharbani 60 snem ka karta. La ong ruh ba ka kurim jong u ka kong Seldaris Kharsyntiew ba 68 snem, ka la shah pynmynsaw bad shah dung ha u nongthombor ha ki bynta jong ka shadem bad kumba long mynta, ka don ha ka jingshah sumar ha Shillong.
La ïathuh ruh ba ki khun khatduh jong kane ka ïing kaba la don 18 snem ka karta, ka la jahrngai na la ïing naduh ba la jia katei ka jingjia.
Na ka liang u Superintendent of Police ka West Khasi Hills, u la ong ba u runar u ba suba donkti ha kane ka jingjua, u la phet rieh bad ïa ka khun khatduh jong kane ka ïing kaba la jahrngai, ym pat lah satia ban tip shano ka don haduh mynta. Ha kajuh ka por la ong ruh ba u kurim jong kane ka samla u la jah rngai lang.
Na ka liang u SP u la pyntip ba ki pulit ki la register case halor kane ka jingjia bad ka jingtohkit mynta ka la ïaid shakhmat. Shuh shuh, la pyntip ruh ba ki Pulit ki la dep ban ithuh ïa ki runar kiba donkti bad ka jingpyrshang ban kem ïa ki, ka la ïaid shakhmat.