SHILLONG, NAITUNG 31: Katba ka jylla Meghalaya ka dang pynkhreh ban pdiang ïa ka 39th National Games ban long ha u snem ban wan (2027), ka Meghalaya Lawn Ball Association (MLBA) ka la shim ïa ka sienjam ban pynlong ïa ka 1st Meghalaya State Championship 2026 kum shi bynta ban jied ïa ki nongïalehkai ki ba lah ban mihkhmat ïa ka jylla ha katei ka lympung ïalehkai bah jong ka ri India.
ïane ka lympung la pynlong ha Laitumkhrah Assamese School, Shillong bad ka la sdang naduh ka 27 tarik haduh ka 31 tarik Naitung, 2026.
Watla kadei ka sienjam kaba nyngkong jong ka MLBA ban pynlong ïa kane ka lympung hynrei ka la lah ban khring pat kumba 80 ngut ki nongïalehkai shynrang bad kynthei, kiba la mihkhmat ïa ki 11 tylli ki District jong ka thaiñ Garo, Jaintia bad Khasi Hills ban ïashim bynta ha kane ka championship.
Ki don saw tylli ki kyrdan ïakhun ba kynthup ïa ka singles, pairs, triples, bad fours
Kane ka lympung ka long shi bynta jong ka jingthmu ka MLBA ban ithuh ïa ki sap ïalehkai kiba kynsai (shynrang bad kynthei), ha kaba yn pynrung 40 ngut na ka bynta ka prokram pynkhreh lane coaching camp, shuwa ban jied ïa ki nongïalehkai ba pura ban mihkhmat ïa ka jylla ha ka National Games ka ban sa wan.
Baroh 40 ngut kin shah pyntbit hapoh ka jingpeit jong u International Coach na Malaysia u Ramble Dallan Rice Oxley.
Ka Lawn Bowls ka dei kawei na ki jingïalehkai ba ka sorkar Meghalaya ka khmihlynti ban ïoh khur takma ha ka 39th National Games.
