Shillong, Naitung 31: Ka Shillong Lajong FC ka la sdang ïa ka jingïakhun jong ka ha ka Durand Cup 2026 da ka namjop kaba da 2-0 kol ïa ka Nongkseh SSCC ha ka jingïalehkai ba sdang jong ka Group E hynne ka janmiet sngi Thohdieng ha JN Stadium.
U Everbrightson Mylliempdah (70′) bad u Tremiki Lamurong (86′) ki la pynkhihjar mar kawei ban pynskhem ïa ka jingjop na ka bynta ka Lajong ha kane ka jingïalehkai Shillong Derby.
Kane kadei ka jingïalehkai kaba nyngkong eh jong ka Nongkseh ha ka Durand Cup bad ka jingshah rem ka la pynkut noh ïa ka jingïalehkai kaba la palat 29 tylli ki jingïakhun khlem shah rem ha Shillong naduh u snem 2025. Kane ka jingïaid lynti ka kynthup ruh ïa saw tylli ki jingïalehkai pyrshah ïa ka Lajong, ha kaba ka la jop ar sien bad ïakhaid ar sien.
Kitei ki jingïalehkai ki dei pyrshah ïa ka kynhun kaba kham tlot jong ka SLFC hynrei hynne ka sngi Thohdieng ka Nongkseh ka la aireng pyrshah ïa ka kynhun ba nyngkong jong ka Lajong.
Ha ka kylla step, ka Nongkseh ka la sdang bha ïa ka jingïalehkai da kaba ïohlad ruh ban pynsyier ïa ka Lajong lyngba ka jingpyrshang jong u Sheen Stevenson Sohktung kaba la jan rung sa khyndiat.
Katba ka jingïalehkai ka dang ïaid, ka Shillong Lajong ka la kham synshar ïa ka pdeng madan hynrei kam shym la lah ban pynurlong ïa ki kabu kaba la pynlong ïa ka kylla step ban kut khlem kol.
Ha ka kylla miet ka Shillong Lajong ka la nang pynkhlaiñ ïa ka jingïalehkai hynrei ka la shimpor haduh ka minit kaba 70 ba ka Shillong Lajong kan la lah ban pynïakhlad ïa ka jingïalehkai lyngba ka kol u Everbrightson. Kane ka la wan na u Jota uba la pynpoi ïa ka bol sha u Phrangki Buam, uba la pynphai biang sha u Everbrightson Sana, bad utei u la thep suk sha ka kol ban pynlong 1-0 kol.
Tang saw minit shuwa ban kut ka jingïalehkai, u Phrangki Buam u la pashat ïa ka bol da kaba kynjat dadien bad u Tremiki Lamurong u la pyndep ïa ka kamram da ka kjat kadiang ban pynjlan ïa ka kol da 2-0 na bynta ka Shillong Lajong.
Ka jingïalehkai kaban wan kan long hapdeng ka NorthEast United FC bad ka Bodoland FC ha ka Group F, ha ka por 4:30 janmiet ha Indira Gandhi Athletic Stadium, Guwahati.
