Phet jyndat u Lyngdoh ka Hima Sohïong na Dorbar Hima ba tieng ban jubab ïa ki paidbah

Shillong, Naitung, 24: U Lyngdoh jong ka Hima Sohïong u Bah Bashemphang Thabah, u la phet jyndat shwa ban sdang Dorbar Hima kaba la pynlong ha ka sngi Saitjaiñ tang na ka daw ba u tieng ban ai jubab sha ki paidbah halor ki mat jingshah ujor kiba har rukom pyrshah ïa u da ka Joint Action Committee Hima Sohïong bad ki shnong bapher bapher
Ïa kane ka Dorbar Hima la khot pynlong da ka jingai bor jong ka Khasi Hills Autonomous District Council (KHADC) lyngba ka shithi sha u Secretary ka Sohïong Lyngdohship, u Bah Polical Diengdoh halor ka phang ka jingujor pyrshah ïa u Lyngdoh.
Ka jingaibor jong ka Council ka dei ruh halor ka jingpan ka Dorbar Hima Sohïong na u Executive Member In-charge Elaka u Bah Jambor War ban phah ïa kane ka kam ujor pyrshah ïa u Lyngdoh sha ka Dorbar Hima, Sohïong Lyngdohship.
Ka Council ka la buh kyndon ba ka Dorbar dei ban pynïaid da uno uno u rangbah bad ym da u Lyngdoh bad kan kynthup ïa ki Lyngdoh Raid, ki Myntri bad ki Rangbah Shnong ka Hima ryngkat ki nongujor bad kan long beit tang halor ka jingujor pyrshah ïa u Lyngdoh Sohïong ym ïa kiwei pat ki mat.
Ka la buh kyndon ba dei ban ailad ïa ki nongujor bad ïa u nongshah ujor ban ïatai ban ïakren bad ba ka Dorbar kan hap shim ïa ka rai ha ka jingïadon lang ki nongpeit pyrman na ka Council.
Hynrei mar ïa khreh sdang ka dorbar ki dkhot jong ka Executive Dorbar Hima bad u Lyngdoh Sohïong ki la pan ban don tang 10 haduh 15 ngut ki briew na ka liang ki kynhun ba ujor ban don hapoh ka Dorbar bad la wan pynkren ïa kane da u ophisar na ka KHADC, u Bah C. Marweiñ uba la buh ban peit pyrman ïa katei ka jingpynlong Dorbar.
Ki dkhot na ka liang kiba ujor ki la pyrshah jur ïa kane bad mar kumta u Lyngdoh bad ki nongkyrshan jong u ki la phet jyndat na ka jaka pynlong dorbar bad kumjuh ruh utei u ophisar u la phet lang bad ka kynhun jong u Lyngdoh.
Shuh shuh kine ki dkhot na ka liang ba ujor ki la ïaid shakhmat ban pynlong ïa ka Dorbar Hima.
Haba kren sha ki lad pathai khubor hadien ba la wai ka dorbar, ki nongïalam jong ka JAC Hima Sohïong bad ki shnong bapher bapher ki la pynpaw ba ka jingujor ba hakhmat eh ka dei halor ka jinglilam jong u Lyngdoh Sohïong ïa ka Shnat Hima ka Hima Nongwah Mawtamur, ka jingpynkheiñ ïa ki riti dustur ha ka shnong Dira, ka jingbym shimkhia ban pyntreikam ïa ka Raid Shylla nalor kiwei pat.
U Chairman jong ka JAC u Bah Purningstar Shabong u la ong ba ka Dorbar Hima ka la rai ba dei ban weng noh ïa u Bah Bashemphang Thabah na ka kam kum u Lyngdoh ka Hima Sohïong. U la kam ruh ba ka jingphet jyndat jong u Lyngdoh na ka dorbar ka dei na ka daw ba um nud ban ïa tynjuh bor.
U la ong ba ka jingtur sha District Council ha ki por kiba ladep ka dei ka bynta ba nyngkong jong ka Direct Action bad lada ka District Council kam lah ban weng shisyndon ïa u Bah Bashemphang Thabah na ka kam Lyngdoh katkum ka rai jong ka dorbar kaba la long ha kane ka sngi, na ka liang jong ki ruh kim banse ban leh ïa ka bynta kaba ar.
Ka kynhun ki lad pathai khubor ki la pyrshang ban ïoh jingkren pynshai na ka liang u Lyngdoh ka Hima Sohïong halor kane ka jingphet jyndat na ka Dorbar hynrei um shym la shim satia ïa ka mobile phone.