Syrtok ki paidbah ba sahteng ka surok ha Kudengthymmai sha Kudengrim

Jowai, Naitung 30: Ki kontraktor ka thaiñ War Jaintia, Amlarem Civil Sub-Division ki la pynpaw ïa ka jingsngewkhia halor ka jingbym pyllait bill ki tnat treikam ka Sorkar Jylla la bun bnai kumba ka ju pyllait shwa ka lehñiam Behdeiñkhlam.
Ha u kyrwoh ba la phah da u Bah K. Pohshna, la pyntip ba ym tang ki kontraktor ki bym shym la ïoh bill hynrei wat ki Muster Roll ruh kim ïoh jingsiew satia bad kane ka buh jingeh ïa ki ban pynïaid ïa ka ïing ka sem.
Na ka liang ki kontraktor ki la kyrpad ia ka Sorkar MDA-II ba la lamkhmat da u Myntri Rangbah Conrad K. Sangma ban pyrkhat lem ïa ka jingeh kaba ki kontraktor ki la iakynduh bad ïa ka jingsiew bainong sha ki nongtrei Muster Roll.
U Bah K. Pohshna uba dei ruh u Adviser ka Synjuk ki Waheh Shnong War Jaiñtia Amlarem dang shen u la leit ruh ban ïakynduh ïa Superintending Engineer ka PWD Circle Jowai ban shimkhia ïa ka surok ka ban pynïasoh na Kudengthymmai sha Kudengrim kaba la sah khongreng khlem pyntrei satia mynta kumba la 4 snem.
“Ka rukom shna ïa ka surok ka long kaba i sangsot bad kane ka la buh jingeh ïa ki paidbah ka War West bad War Central wat hadien ba ki la khmihlynti ban ïoh ïa ka surok kaba bha kaba pynsuk ia ki paidbah ha ka leit ka wan sha ki jaka ïew, ki jaka sumar bad sha ki skul ki kolej ban leit na Amlarem, Padu, Kudengrim shaduh Kudengthymmai,” la ong u Bah Pohshna.
U Bah Pohshna u la kyrpad ïa ka tnat PWD ba kan bthah mar mar ban pyntrei noh ïa katei ka surok ha kine ki sngi hynrei lym kumta ka Synjuk ki Waheh Shnong kam banse ban ujor da ka PIL sha ka ïingbishar Meghalaya High Court halor ka jingsahteng ka jingshna ïa ka surok.