Nongstoiñ, Naitung 30: Ka shnong Riangdo ka dei ka shnong kaba la paw bha ha ka thaiñ Lyngngam bad ka dei ruh ka jaka pdeng jong ka khaïi pateng, namar ka don ka surok bah kaba pynïasoh shaduh Boko (Assam) ha kaba ha ki snem ba mynshuwa, ha ka por ba ka jingkhaïi dewiong kam pat shah khang ha ka National Green Tribunal, da ki spah tylli ki trok ha ki por tlang ki ïaid lyngba katei ka shnong Riangdo.
Ha katei ka shnong ki don ruh ki tnad treikam jong ka sorkar kum ka Block Office, PWD, Sub Divisional Officer jong ka Mawshynrut Civil Sub Division bad bun kiwei kiwei ki tnad treikam, kiba peit ïa ka roi ka par bad ka jingmyntoi jong u paitbah nongshong shnong.
Kum ban pynkynmaw ba ha katei shnong ka don ruh ka ïew kaba ju long shisien shi taïew man la ka sngi thohdieng bad ka dei ruh ka jaka kaba kiew sted ha ka khaïi pateng ka kamai kajih ka pule puthi bad ka jingdon briew.
Ha ki snem ba la dep ki paitbah pat ki ïakynduh jingeh bha ban kynshew ïa ka pisa tyngka kaba ki ïoh ban lum na ka kamai kajih jong ki, namar ka dang don tang ka tnad kynshew pisa jong ka Meghalaya Rural Bank.
Hynrei, la katto katne snem mynta naduh ba ka kawei ka tnad kynshew pisa jong ka State Bank of India ka la sdang ban treikam, ha kaba ka la ai mynsiem shibun bad pynsuk ruh ym tang ïa ki nongkhaïi bad ki mahajon, hynrei wat ïa ki paitbah nongshong shnong jong ka thaiñ baroh kawei.
U bah S.Rynñiaw uwei na ki nongshong shnong katei ka thaiñ haba ïakren bad u nongthoh khubor, u la ong ba ha ki snem ba mynshuwa ki paitbah kiba leit thep bad sei pisa ki hap ban ïeng da u laiñ da ki bun bun kynta, namar ba ka dang don tang Meghalaya Rural Bank.
Bun phew sien ki paitbah ki hap ban leit thep bad sei pisa man ka por kat haduh ba katei ka tnad treikam jong ka, ka la shem shitom ban ai ka jingshakri kaba paka na ka bynra ki paitbah nongshong shnong ka thaiñ.
Hynrei, naduh ba ka State Bank of India ka la buh ïa ka tnad treikam ha u snem 2021, ka la long ka jingmyntoi kaba khraw bad ka la pynsuk shibun ïa ki paitbah nongshong shnong kiba dei ki nong kynshew pisa haba ki leit ban sei ne ban thep. Nalorkata ka la pynsuk ruh ïa ki Kontraktor kiba donkam ban sei ia ki bill jong ki jingtrei jong ki.
Watla katta ruh, u la ong ba ka naduh u snem 2021 haduh mynta, ka jinglong jingman jong ka SBI ha Riangdo ka dang tlot palat haduh katta katta bad kam shym la lah ban ai ka jingshakri kaba pura na ka bynta ki paidbah. Ka dang donkam ban thung shuh shuh ïa ki nongtrei ha katei ka tnad treikam, khnang ba kan kham pynsuk shuh shuh ïa ki paitbah haba ki donkam.
Kumba long mynta kane ka tnad ka dang duna nongtrei palat, namar ba ka don tang uwei u Cashier, Branch Manager, uwei u Security bad uwei u ba shu ïarap. Katba ha ka sngi balang ka SBI Riangdo ka khang, namar ki nongtrei ki hap pyndep bun kiwei pat ki kam ha SBI Nongstoiñ. Kumjuh ruh haba plie account la shah tang lai haduh saw ngut ha ka shi sngi, kumta donkam ban thung shuh shuh ki nongtrei, u la ong.
Kumjuh ruh ka la don ka jingkyntu kaba jur na ki paidbah ba la kumno kumno ka State Bank of India ka la dei ban buh noh sa ka ATM ban pynsuk ha kaba sei pisa, kaba lada phai katkum ka jinglong jong ka por lei lei la donkam buh bun tylli.
U Bah Rynñiaw u la ong ba na ka por sha ka por ki riew rangbah, ki nongïalam sengbhalang bad kiwei ki ju leit ban kren bad kyrpad na u Branch Manager ryngkat ki jingthoh ban kyrpad ba un leh katba lah ban pynurlong halor ki jingdonkam ki paidbah. Hynrei, imat ki bor ba halor jong kane ka tnad kaba don ha Guwahati, kim shym la sngap satia bad ka jinglong jingman jong ka SBI ha Riangdo ka long sah kumjuh.
