Da ka Operation Free Flow, khynra bad pyndait klam ki pulit ïa ki kali ba pynïeng be-aiñ ha lynti paidbah

Shillong, Naitung 27: Halor ka jingdonkam ban wanrah ïa ka jingïaid beit ïaid ryntih khlem don kano kano ka jingwit ïa ka leit ka wan ki kali bad ki briew ka tnad pulit ka East Khasi Hills District ka la pynlong ïa ka jingkhynra naphang ïa ki kali bad ki kali ar shaka kiba pynïeng beaiñ ha ki lynti ïaid kjat bad harud surok.
Shuh shuh ban ïakhun pyrshah ïa kane ka jingpynïeng beaiñ ha ki jaka bym dei ban ïeng ki pulit ki la jer kyrteng kum ka Operation Free Flow, kane kam da dei eh tang kata ka jingpyntreikam ïa ka aiñ hynrei ka long ban hikai ïa ki briew ba kin sngewthuh hangno ban pynïeng kali bad hangno dei ban kiar kane ka long ban wanrah ïa ka jingshngaiñ lait noh tang ha ka por ba donkam kyrkieh kum ha ka pang ka shitom ban ïoh dawai dashin.
Na ka liang ka Shillong Traffic Police ka kyntu ïa baroh ki paidbah nongshong shnong ban ïatreilang bad ban ïa kyrshan lang ha kane ka jingïaleh ban hikai ïa ki briew ban ym pynïeng kali pathar ha ki jaka bym dei namar ba ka long kaba donkam ban ïabud ryntih ban pynlong ïa ka nongbah Shillong kaba shngaiñ ha ba ïaid ba ïeng bad ka jingïaid kaba khlem don kano kano ka jingpynwit.
Kumta ha ka sngi nyngkong ki pulit ha kylleng ki la pyndait klam ïa ki kali bad ïa ki kali ar shaka kiba la pynïeng klumar ha ki jaka ïaid kjat ki jaka bym dei ki jaka ïeng khamtam eh ha ki bynta jong ka Police Bazar naduh Lad Umsohsun shaduh Khyndailad kumjuh ha ki jaka jong ka Shillong Contonment Board ha Them Bijoy ki pulit ki la pyndait klam ïa ki kali ar shaka kiba pynïeng ha ki jaka bym dei ban pynïeng.