ïakynduhlang ki Sahep Judicial ha ka jingïalang ba kyrpang jong ka Meghalaya State Judicial Academy

Shillong, Naitung 27: Ka Meghalaya State Judicial Academy, jong ka High Court Meghalaya, ka la pynlong ïa ka prokram ba shi sngi halor ka phang “Bridging Law and Justice: From Principles to Practice” ha ka 25 tarik Naitung, 2026, hapoh ka jingïalam jong ka Hon’ble Justice Revati Mohite Dere, Chief Justice jong ka High Court ka Meghalaya bad Patron-in-Chief jong ka Academy.
Ha kane ka prokram la wan ïashim bynta da ki Judicial Officer na kylleng ka jylla, ban kyntiew ïa ka jingtip ha ka kam aiñ, ki nongrim kiba bha, bad ka jingshemphang ha ka rukom bishar kaba paka. .
Ka prokram ka la sdang da ka jingkren plie na ka Meghalaya State Judicial Academy. Hadien kane, u Justice Abhay Srinivas Oka, Judge barim jong ka Supreme Court ka India, u la ai ka jingkren halor ka Conduct and Ethics bad Court Management, da kaba ban jur ïa ka jingdonkam ka jinglong hok, ka jingbishar khlem jingïashah liang bad ka jingpynïaid ïa ka ïingbishar da ka rukom kaba dei.
Ka prokram ka la ïoh ruh ïa ki jinghikai na ki Judge kiba rim jong ka Bombay High Court.
Ka Justice Shalini P. Joshi ka la ai ka jinghikai kaba bniah halor ka Protection of Children from Sexual Offences (POCSO) Act, kaba kynthup ïa ka rukom shim jingïathuh na ki khynnah kiba shah ktah, ka jingbishar ïa ki sakhi, ka jingpynshisha ïa ka rta bad ka rukom pynlong ïa ki mukotduma da kaba burom ïa ka jinglong jong ki khynnah.
Ha ka bynta kaba lai, ka Justice Sadhana Sanjay Jadhav ka la batai bad ïanujor ïa ka Indian Evidence Act bad ka Bharatiya Sakshya Adhiniyam, ban pynsngewthuh ïa ki jingïapher bad ki jingkylla ba kongsan ha ka aiñ sakhi.
Ka bynta kaba khatduh la pynïaid da ka Justice Mridula Bhatkar, kaba la kren halor ki injunctions hapoh ka Code of Civil Procedure, ka rukom thoh ïa ka jingbishar (judgment writing), ka jingpyndonkam hok ïa ka bor bishar bad ka jingpyrkhat katkum ka aiñ bad ka nongrim jong ka jingbishar hok.
Hadien man la ka technical session, la pynlong ïa ka jingïakren paidbah, kaba la ai lad ïa ki Judicial Officers ban kylli jingkylli bad jingïakren bad ki riewshemphang halor ki jingeh kiba ki ïakynduh ha ka kam bishar kaba janai.
Ïa ka prokram la pynkut da ki jingkren khatduh, da kaba pynskhem biang ïa ka jingaiti jong ka High Court of Meghalaya bad ka Meghalaya State Judicial Academy ban bteng ïa ka jingai jinghikai ïa ki nongbishar bad ban pynkhlaiñ ïa ka jinglah jong ki. Kane ka sienjam ka pyni ïa ka jingangnud kaba skhem jong ka Chief Justice ban kyntiew ïa ka rukom bishar kaba paka tam lyngba ka jingshemphang bad ka jingïasam jingtip bad ki riewshemphang ha ka kam aiñ.