Mynjur ka Kynhun Myntri ban siew 22.7 klur ka bai luksan ïa ki jaka ba pynïaid bording ha Mawkhanu

Shillong, Naitung 27: Ka Kynhun Myntri ka Sorkar Jylla ha ka sngi Nyngkong ka la mynjur ban siew 22.37 klur tyngka kum ka bai luksan sha ki trai jaka kiba shah ktah ha ka jingtei ïa ka 132 KV transmission line kaba jrong kumba 6.5 kilometre ha Mawkhanu, New Shillong Township.
Ïa kane ka rai la shim ha ka jingïalang jong ka Kynhun Myntri kaba la pynïaid da u Myntri Rangbah ka jylla u Conrad K. Sangma.
Haba kren sha ki lad pathai khubor hadien ka jingïalang, u Myntri ka Sorkar Jylla u Marcuise N. Marak u la ong ba kane ka transmission line kan pynïasoh ïa ka 220/132 KV Substation kaba don lypa bad ka 132/33 KV, 2×50 MVA Mawkhanu Substation kaban sa shna.
“Ka transmission line kaba jrong kumba 6.5 kilometre ka dang ïaid shakhmat sha ka Mawkhanu Substation. Na ka bynta kane ka projek, ka Sorkar ka hap ban shim katto katne ki bynta jaka, bad ka Kynhun Myntri ka la ai jingmynjur ïa ka bai luksan na ka bynta ki trai jaka kiba shah ktah,” la bynrap shuh shuh u Myntri.
U la ong ba ka pisa kaba la mynjur kaba kot 22.37 klur tyngka yn pyndonkam ban siew bai luksan sha ki trai jaka kiba don ha ka lynti ïaid jong kane ka transmission line.
Shuh shuh u Myntri u la batai ruh ba ha ki projek transmission line, ka jaka kaba ka tnat ka pyndonkam la tip kum ka Right of Way (RoW), kaba ka Sorkar ban pyndonkam ïa ka jaka na ka bynta ka jingtei bad ka jingpynïaid ïa ki laiñ bording.