Mairang, Naitung 26:Ka Eastern West Khasi hills ka dei ka district kaba dang thymmai hynrei haba nujor bad kiwei pat ki district hapoh ka jylla ka dei ka district kaba kiewsted bha ha ki liang baroh la ka long ha ka ïoh ka kot , ka pule puthi , ka koit ka khiah, ka kamai kajih bad kiwei kiwei.
Nalor kata ka dei ruh ka district kaba shong suk shong saiñ ha ki liang baroh ha kaba ka synshar khaddar ha ki shnong ki thaw ka logn kaba ïaid beit ïaid ryntih bha.
Ka shnong Mairang kaba dei ka headquarter jong ka district kaba kynthup lang ïa ki shnong kiba heh naduh Mawsawa, Pungsañiang, Pyndengumïong, Langstiehrim, Sangshong, Lumsohkhlur, Mission bad Mairangbah ka dei ka jaka pdeng ha kaba ki tnad trei kam jong ka sorkar ki don.
Shuh shuh ka ïew Langstieh kaba don hapoh u pud u sam jong ka shnong Pyndengumïong ka dei ka jaka pdeng jong ka khaï ka pateng jong baroh ki shnong kiba hap ha ka hima ka hima Nongkhlaw kaba la ju tip ruh kum ka hima Khatsawphra.
Haba phai sha ka koit ka khiah katei ka district ka la don haduh lai tylli ki jaka sumar kiba paka kata ka Mairang Primary Health Centre kaba la don naduh saw phew snem mynshuwa, ka Holy Cross hospital kaba la buh da ka Catholic Mission bad ka Mairang Civil Hospital.Kitei ki lai tylli ki jaka sumar ki dei kiba la bit la biang nadong shadong naduh ki doctor, ki Nurses bad ki nongtrei ha baroh ki bynta.
Ha kaba ïadei bad ka pule puthi katei ka district ka don ïa ki skul kiba paw bha naduh mynshuwa eh kum ka Langtor Higher Secondary school, ka Mairang Christian Higher Secondary school ka St Joseph Higher Secondary school bad kitei ki skul ki dei ki shlem ai jinghikai kiba paka tam hapoh ka district kiba la pynmih shibun bah ki khynnah kiba la wan shakhmat duh ha ki Exam bapher bapher la ki dei ki Exam ba la pynlong da ka Megalaya Board Of School Education kum ka Secondary School Leavig Certificate, Higher Secondary School Leaving Certificate bad kiwei kiwei.
Ha kajuh ka por ka jingdon jong ka Tirot Singh College ka la long ka jingkyrkhu kaba khraw ïa ki samla pule jong ka district khamtam eh ïa kito ki samla kiba dei na ki long ïng kiba duna ka ïoh ka kot bad kiba thrang ban bteng ïa ka jingpule jong ki.
Haba phai pat sha ka jingtrei kam jong ki ophis sorkar ka long kaba sngewtynnad ba ki ophisar bad ki nongtrei ha kawei pa kawei ka ophis sorkar ki dei kiba trei shitom bad ki bym ju pynsep ei ïa ka por jong ki hynrei ki trei shitom bad trei hok ïa ki kam na ka bynta ban ïarap ïa ki paitbah nong shong shnong.
Haba phai pat sha ka rep ka riang wat la ki jaka kim da dei ikiba sei soh hynrei ki nongrep ki dei kiiba trei shitom bad ki ba minot ïa la ki kam ha ryngkat ka jingïarap kaba ki ïoh na ka sorkar lynga ki ophisar jong ka Agriculture bad ka Block ophis bad katei ka jingïatei lang jong ki ha baroh ki liang ka la pynlong ïa ki nongrep ba kin kiew ha ka ïoh ka kot bad ka kamai kajih jong ki.
Ha kajuh ka jingkiew sted jong ki shnong ki thaw ka dei ruh namar ba ki paitbah jong ki artylli ki constituency hapoh ka district ki la jied ïa ki nongmihkhmat kiba don shisha ka jingkitkhieh na ka bynta ka roi ka par bad ka bha ka miat jong ki paitbah.
