Shillong, Naitung 26 : Ka jingpoi ki nonghikai ban ïaleh ïa ka eksamin Megalaya Teachers Eligibility Test 2026 kala kot palat 95% ha ka 24 tarik Naitung ha ki 58 tylli ki centre ha baroh ki district bad sub-division ka Jylla.
Kat kum ka jingkheiñ, ha kane ka eksamin ba la pynlong da ka Directorate of Educational Research and Training (DERT), haduh 95.23% na ki 23,101 ki nonghikai ba aplai, ki la poi thoh ïa ka eksamin Paper I na ka bynta ki klas I-V katba 95.89% na ki 22,821 ki nonghikai ki la wan thoh ia ka eksam Paper II na ka bynta ki klas VI haduh VIII.
Ka MTET ka dei ka kyrdan ba kongsan bala buh da ka National Council for Teachers Education (NCTE) ha ka jingthungkam ïa ki nonghikai jong ki klas I haduh VIII.
Ki Ophisar ka DERT ki pyntip ba kane ka jingpoi bun ki nongïakhun ïa ka eksamin ka pyni ïa ka jing kwah bad ka jingaiti lut jong ki nonghikai ba don ha ka kam ba kin pass ïa ka test.
Ia ka eksamin la pynlong ha ka rukom kaba khuid bad kaba shai, ong ka Directorate, haba bynrap ba ïa ka result yn sa pynbna ha ki khyndiat por ban wan.
