ïaishah shipor ka sorkar ka dang pynkhreh kaba kumno ka buit tih dewïong da ka juk Saïan yn pyntreikam : Santa

By Mawphor Editor On Jul 27, 2026

Shillong, Naitung 26 : Ka MLA jongka NPP na ka Sutnga-Saipung Constituency ka Kong Santa Mary Shylla ka la ong ba dei kane ka sorkar MDA ba la ïalam da ka NPP kaba la wanrah ïa ka jingtih dewiong da ka juk Saian ha East Jaintia Hills hynrei haba la pyntreikam la ïohi ba kane ka rukom tih da kaba klong lut ïa u lum kam ïahap satia ha kane ka jylla kumta ka la kyntu ïa ki paidbah ban ïaishah shipor namar ka sorkar ka dang pynkhreh ban wanrah da ka buit tih dewiong da ka stad saian hi tangba yn ïoh ban tih lut da baroh ki trai par dewiong.
Haba kren ha ka jingïalang paidbah ban ïalap elekshon na ka bynta u kyrtong ka NPP u Dr DRL Nonglait ha Sutnga ka la pynkynmaw ba ka jingkhang tih dewiong ka la sdang naduh u snem 2014. Ka sorkar ka la pyrshang ban thaw lad kumno ban tih dewiong da ka juk saian ha ka thaiñ.
“Dei tad ha kane ka sorkar MDA ba ïalam da ka NPP ba la shim khia ban wanrah ïa ka jingtih dewiong da ka jingstad saian. Phi kynmaw naduh ba la khang ha u 2014 bad ka sorkar ka la thaw ki lad ki lynti ban tih da ka jingstad saian kaba la sdang mynta hynrei la lap pat ka jingtih kumba long mynta kam ïahap satia ha ka ri lum Jaintia. Kumta ka sorkar ka dang pynkhreh mynta ban wanrah pat da ka buit tih dewiong kaba long da ka jingstad saian hi tangba kaba lah ban tih da baroh ym ban pynheh ïa ka jaka kumba long mynta kaba kiwei kim kot bor shuh” ong ka kong Santa.
“ Ngi la pyrshang ban ïarap ïa phi bad nga kyntu ïa phi ba phin phai sha kane ka sorkar kaba trei bad shakri hok ïa phi da kaba phin ai kajingkyrshan ba pura ïa kane ka sorkar kaba wanrah ïa shibun ki kam pynroi pynpar” ong bniang ka kong Santa.
Ka la pynpaw ruh ïa ka jingdonkam ban kyntiew ïa ka roi ka par ha ki thaiñ khappud namar ka constituency jongka ka ïajan bad mar khap bad ka Bangladesh.
Ka la kyntu ruh ïa u kyrtong ka NPP u Dr DRL Nonglait ba ynda u la jop ha kane ka election shiteng samoi ba un rah hapoh parliament ïa kane ka jingtih dewiong hapoh ka jylla.
“ Ngi ki briew jong kane ka thaiñ ngi im ja da kane ka kam tih dewiong. Na kata ka daw nga kyrpad ïa phi haba phi la shah jied kum u MP jong ngi sngewbha kren halor ki jingeh kiba ki nong Jaintia ki ïakynduh” ong biang ka kong Santa Mary.
Ka pynpaw ka jingkyrmen skhem ba u kyrtong ka NPP un jop beit ha kane ka election shiteng samoi bad un rah ïa kine ki jingeh jong ki paid ka East Jaintia hapoh ka Parliament.