91 snem la pynwandur ïa ki longkmie ban ïalam bad noh synniang ha ka pule puthi: Myntri Pule Puthi

Shillong, Naitung 26: Ka Lady Keane College, kaba long kawei na ka shlem ai jinghikai kaba la rim, ka la rakhe ïa ka sngikha 91 snem hapoh ka phang “Building Tomorrow with 91 Years of Legacy.” Kane ka jingrakhe ka pynkynmaw ïa ki jingïaid lynti jong ki mawmer kane ka jaka pule kaba janai, kaba pynkupbor ïa ki longkmie, bad kaba angnud ban tei ïa ka ri ha kine ki 91 snem ba la leit.
Kane ka jingrakhe la wan ban long kongsan da u Myntri ka tnat Pule Puthi ka sorkar jylla u Bah Lahkmen Rymbui. Kiba la donlang ki long ka H.B.D. Sangma, MCS, Director ka Directorate of Higher & Technical Education (DHTE), ki dkhot ka Governing Board, ki samla pule barim, ki nongtrei, ki samla pule, bad kiba la shah khot sngewbha.
Haba kren ha ka jingïalang, u Myntri ka tnat Pule Puthi u la ai khublei ïa kane ka jaka pule kaba la kynjoh sha ka jingdap kaba 91 snem kaba la pynwandur ïa ki pateng jong ki longkmie ban long ki nongïalam bad kiba noh synniang shibun bha ha ka pule puthi ha Meghalaya bad ha Northeast. U ong ba ka Lady Keane College ka long kum ka dak jong ka jingjanai kiba ka jingnoh synniang ka la ïar shalyndet ka pule puthi shaduh ka jingpynkupbor ïa ki longkmie bad ka imlang sahlang baroh kawei.
Haba kren halor ka jingkylla ba sted bha ha ka pyrthei, u Myntri u la pynshlur ïa ki samla pule ban long kiba pynleit jingmut, ban ïaishah bad ban pdiang ïa ka jingkiew bad ïaid shaphrang ki bor technology bad ki lad kiba bun kiba lah ban ïoh ha kine ki sngi.
U la kyntu ïa ki samla pule ba kin pyndonkam da ka jingkitkhlieh ïa ka technology, ban sumar ïa ka bha ka miat ka bor pyrkhat, bad ban pynroi ïa ka jinglah ban pyrkhat ïa kiba eh bad ban shim ki rai.
Haba kren ha kane ka sngi ka H.B.D. Sangma, MCS, Director Directorate of Higher & Technical Education, ka la ai khublei ïa ka Lady Keane College halor ki jingnoh synniang ïa ka pule puthi ki longkmie bad ka jingpynkup bor ïa ki. Ka la ong ba kane ka jaka pule ka long kum ka ding jong ka jingjanai ha kaba ki kam jong ka, ki bteng ban ai mynsiem ïa ki pateng ki samla pule.
Ha kane ka sngi u Myntri ka tnat Pule puthi u la pynlait ïa ka College Magazine, ka Keanean Journal of Arts, bad ka Annual History Magazine, kaba pyni ia kawei pat ka sienjam jong u mawmer kane ka jaka pule halor ka jingnang jingtip bad ki jingjop jong ka ha ka thoh ka tar.
Ha kane ka jingrakhe, ka la sam ruh ïa ki khusnam bad ki jingithuh sha ki samla pule, ki nongtrei, ki nonghikai bad sha kiwei halor ki jingjop bad ki jingnoh synniang. Ïa ki khusnam la sam ha ki rukom bapher bapher kynthup ha ki Research Publication, Meritorious Student ka Higher Secondary Section, Student Cells, PWD Cell, Fashion Design, bad Co-curricular and Extra-Curricular Activities.
Ha kane ka sngi ki la don ki jingshad tynrai bad kiwei ki prokram ba la pyni da ki samla pule lyngba ki jingriewspah ki sap ki phong, ki jingshem thymmai bad ki jinghiar pateng jong ka kolshor deiriti.