New Delhi, Naitung 26: Ka tnad syntiat ïa ki kam khaïi tuh ka Directorate of Revenue Intelligence (DRI) ka la pynlong ïa ka jingkhynra ha ki jaka ba bun ha kylleng ki bynta jong ka Ri India ban thwet ïa ki nongkhaïi ksiar beaiñ.
Ha kane ka jingkhynra la ïoh kurup 27 kilo ka ksiar bad la ïoh ban kem 12 ngut ki briew kiba la suba ba ki don kti ha kane ka kam khaïi beaiñ, ka ksiar baroh kaba la ïoh ban kurup ka dei kaba nabar jong ka ri.
Ka ophis jong ka DRI Mumbai ka la ïoh ïa ka jingtip kaba bniah bha ha ka 23 bad 24 Naitung 2026 don briew ba wan da ka lieng suiñ na Addis Ababa la buh rieh bha ka ksiar ha sad jong ka liengsuiñ ha kaba la ïoh ban kurup 12 kilo da ka jingïarap ki nongtrei liengsuiñ.
Ha ka 23/7/2026 la ïoh ban bat kawei ka kynthei kaba la leit da ka Brahmaputra Mail ha Uttar Pradesh na kane la ïoh ban kurup 12 tylli ki biskit bad kane ka la kot sha ka 5 kilo bad ïa kine ki ksiar la wan na Bangladesh ban shallan sha India, la kurup ïa ka ksiar bad la kem ïa katei ka kynthei.
Na Mumbai la ïoh ban kurup biang 3.7 kilo ka ksiar ba la buh rieh ha ka bthing bad ha kane ka jingjia san ngut ki briew la kem bad ha ka 19 bad 20 Naitung 2026 la ïoh ban kurup 4.6 kilo ka ksiar na Kolkatta kiba la thep ha ki khiew shet ja bad la ïoh ban kem ïa ki nongkhaïi drok kiba la wan rah na Myanmar ruh kumjuh.
Katba na Guwahati la ïoh ban kurup 2 kilo ka ksiar ïa kane ka ksiar la ïoh ban kurup na uwei briew ba dang wan na Dubai ba la buhrieh ha kali ki briew, ong ka DRI ki la kem ïa kine ki briew ruh kumjuh, ka jingbteng ban khynra ïa ki nongkhaïi beaiñ ka dang ïaibteng haduh kine ki sngi.
