Sorkar India pybeit mardor ïa ki jingeh bad jingdawa ki samla lyngba ka jingïakren: NESO

Shillong, Naitung 24: Ka North East Students’ Organisation (NESO) ka pynrem jur halor ka jingpyndonkam da ka bor kaba shyrkhei bad kaba palat pud jong ki Pulit pyrshah ïa ki samla pule kiba ïashim bynta ha ka jingïakhih ba jai jai ha New Delhi ha ka 20 tarik Naitung 2026.
Katkum ka dorkhas ba la soi da u Bah Samuel B Jyrwa uba dei u Chairman ka NESO bad u General Secretary ka NESO u Mutsikhoyo Yhobu kila ong, Ki jingjia ba pynkulmar jingmut jong ki jingshah thombor da ki lathi, ka jingpyndonkam ïa ki lyer pynsat khmat (tear gas) bad ka jingbuh ïa ki briew kiba khlem phong phong uniform kiba bat ki lathi pyrshah ïa ki samla pule ki bym don tiar ki pyni ïa ka jingshah thombor kaba shyrkhei ha ka ri synshar paidbah bad ki hok riti synshar jong ki nongshong shnong ban ïalum lang ba jai jai bad ban pynpaw ïa ki jingsngewsih kiba dei hok.
Ka NESO ka pynrem jur ïa ka Sorkar India namar ka jingbym shim khia jong ka ia ka mat kaba ktah beit ïa ka lawei jong ki million ngut ki samla pule ha kylleng ka ri.Ha ka jaka ban ïatreilang bad ki jingeh jong ki samla pule lyngba ka jingïakren kaba don jingmut bad ka jingïarap kaba tei, ki bor synshar ki la pyndonkam da ka jingpynshitom beiñ bad jingpyntieng pynsmiej.
Ki jingeh ba la pynpaw da ki samla pule kiba ïakhih kynthup ïa ka jinglait tuh ki jingkylli ba ju jia man ka por, ka jingdonkam kyrkieh ïa ka jinglong kaba shai, ka jingkitkhlieh, ka jinglong hok ha ki rukom thung kam bad eksamin ki long kiba dei hok bad ki dawa ban shimkhia mardor.Ki jingangnud bad ka jingtrei shitom jong ki samla pule kiba dei hok bym lah khein kim dei ban shah pynduh noh satia namar ki jingbymlah jong ka rukom treikam, ka jingbamsap ne ka jingbym shim khia ha ka rukom synshar.
Ka NESO ka ieng ha ka jingïatylli bad baroh ki samla pule kiba la sngewsih bad kiba shlur shisha ban ïashim bynta ha ka jingiakhih kaba jai jai bad ka pynpaw ïa ka jingsngewkhia kaba khraw ïa kito kiba la mynsaw ha ka por ba ki pulit ki pynshitom bein.Ngi kitbok kitrwiang ïa ki ba kin koit noh kloi bad ngi pynskhem biang ïa ka jingkyrshan ba skhem jong ngi ïa ka jingwad jong ki ïa ka hok bad ki jingpynkylla ïa ki tnat treikam.
Ka NESO ka kyrpad jur ïa ka Sorkar India ban pynbeit noh mardor ia ki jingeh bad ki jingdawa ba shisha jong ki samla pule lyngba ka jingiakren kaba shisha, ban pynthikna ïa ka jingkitkhlieh na ka bynta ka jingpyndonkam bor palat bad ban pyntreikam ïa ki jingpynkylla kiba bniah ban pynphai biang ïa ka jingshaniah, ka jingshai bad ka jinglong hok jong ki rukom thoh eksamin bad thung kam jong ka ri.