Shillong, Naitung 24: Ka Seng Samla Mawlai Pyllun (SSMP) hapoh ka jingïalam u President bah Samuel Biam, hynne ka sngi Thohdieng ka la pynkup burom ïa arngut ki heprit, kata u Mekhamkhraw Nongrem bad u Donald Myrthong kiba la wanrah nam bad burom ïa ka jylla Meghalaya hadien ba ki la wanphai kum ki lahduh ha ka Gothia Cup 2026 kaba la long ha Sweden.
Haba kren sha ki lad pathai khubor, na ka liang u bah Samuel u la ai khublei ryngkat ka jingïaroh ïa kine ki arngut ki heprit kiba long ki nuksa ba bha sha kiwei pat ki khynnah kiba ieid bad sngewtynnad ïa ka phutbol.
“Phi la rah ïa ka burom jong ka Meghalaya bad ïa ka India bad phi la pynsngewsarong ïa ka jaitbynriew baroh kawei,” la ong u bah Samuel da kaba bynrap ba lada ka India ka ïoh rung sha ka World Cup, lehse baroh arngut kin ïoh ïa ka lad ban mihkhmat ïa ka kynhun.
U la ai ruh ka jingïaroh ïa u coach ka Minerva FA u Rajat Bajaj, ïa ka jingangnud jong u ban kyntiew ïa ka sap jong ki khynnah bad ka jingkwah jong u ban pynpoi ïa ka India sha ka kyrdan kaba kin lah ban ïashim bynta ha ka World Cup, da kaba pynpaw ba lyngba kane ka academy kine ki arngut ki heprit lehse kin long ka lawei jong ka ri India.
Baroh arngut ki la long shi bynta jong ka kynhun ïalehkai Under-12 jong ka Minerva Academy, India, kaba la rah ïa ka nam lahduh jong ka Gothia Cup 2026 ha Sweden, da kaba pynliem da 2-1 ïa ka RS Sports na Brazil ha ka phainal, bad jia ryngkhat ba ka namtam ha kane ka jingïakhun la ïoh ban thep da u Mekhamkhraw ha ka minit kaba 49.
Ka jingïaid lynti jong ka kynhun ha kane ka lympung ka kynthup ïa ka jingjop pyrshah ïa ka: Prep Schools Pumas Blue (England) da 12-0; Lillestrom SK 3 (Norway) da 13-1; Surte IS FK (Sweden) da 16-0 ha ka Group Stage; nangta Legacy Academy (Kenya) da 6-2 ha ka Round-64; Prep Schools Lions (England) da 10-1 ha ka Round-32; OFC Couronnes (France) da 17-1 ha ka Round-16; Cancheritos FC (Bolivia) da 8-0 ha ka Quarter-final; FC Lokomotyv Kyiv (Ukraine) da 3-2 ha ka Semi-final; bad ïa ka RS Sports Yellow (Brazil) da 2-1 ha ka final.
