Shillong, Naitung 24: Ka Meghalaya Athletics Association lyngba ka kyrwoh ka la pynbna ba kan sa pynlong ïa ka State Athletics Championship 2026 na ka bynta ki shynrang bad kynthei ha ka 14 haduh ka 16 tarik u Nailur, 2026 ha Sports Authority of India (SAI) NEHU, Shillong.
ïa kane ka Championship yn kyrshan ïa ka da ka Directorate of Sports & Youth Affairs jong ka sorkar Meghalaya. Katkum ka kyrwoh, ka long kaba donkam ïa baroh ki District kiba ïasoh bad ka MAA ban ïashim bynta.
ïa ka bai rung dei ban pynpoi lyngba ka ONLINE ha ka AFI website da ka District ba la pynïasoh ym da ki nongïalehkai shimet. Ka jingpynrung kyrteng kan plie ha ka 17 tarik u Nailar bad kan khang ha ka 31 tarik u Nailar.
Ka long kaba donkam ïa baroh ki nongïalehkai ban don ïa ka AFI UID khnang ban ïoh ban ïashim bynta ha kane ka Championship.
Ki nongïalehkai ki lah ban ïashim bynta tang ar tylli ki jingïakop shimet lane Individual Event bad ar tylli ki Relays. Kawei pa kawei ka District ka lah ban phah 32 ngut ki nongïalehkai (16 shynrang bad 16 kynthei).
Ki jingïakop ban pynlong ha kane ka lympung ki kynthup ïa ka 100m, 200m, 400m, 800m, 1500m, 5000m, 10000m, long jump, high jump, triple jump, javelin (800g), discus (2kg), shot put (7.26kg), hammer throw (7.26kg), half marathon, 4x100m relay, 4x400m relay and 4x400m mixed relay.
Na ka bynta ki jingtip ba kham bñiah phi lah ban phun ha kine ki number; Organizing Secretary bah Finely L Pariat +91 9856041365; Competition Manager bah Pleasantly Synnah +91 7005421045.
