Kynnoh kiba die madan ba ka Sorkar ka ïohnong na u drok bym weng shuh ïa ki khar metor

Shillong, Naitung 23: Kiba shongdie madan na ki san tylli ki jaka jong ka thaiñ Motphran ha ka sngi Palei ki la pynpaw ïa ka jingpyrshah kaba jur halor ka jingthmu jong ka Sorkar jylla ban phah shong ïa ki hapoh ka jaka ïeng kali kaba don ha Them Ïew Mawlong.
Kiba die madan kiba ngat ban shong ha katei ka jaka ïeng kali ki long kiba ju shong ha Bimola, na Motphran, Wahthapbru, Umsohsun bad Ïew Mawlong.
Haba pynpaw ïa ka jingbitar, kiba shong die madan ki la kynthoh jur ïa ka Sorkar Jylla da kaba ong ba kumno ka Sorkar ka nud ban phah shong ïa kiba die madan ha jaka ïeng ki bus, bad ka mut ban shu thynnñan kum ki phan ki piat, ki masi ki blang ha ka jaka ïeng bus.
Ki la kynthoh ruh da kaba ong ba ym ai ïa ki ha jaka ïeng kali Jaïaw, hynrei tei pynban da ka jaka ïeng kali ban myntoi ïalade, bad ki la pynpaw ruh ba balei ka Sorkar kam nud ban weng ïa khar metor kiba la katno snem shuh la shu kular kai.
Ki la kynnoh ruh ka jingbym nud weng ka Sorkar ïa ki khar metor kadei namar ba don u drok bad kane ka pyni ba ka don kaei kaei kaba sha lyndet bad ba ka ïoh nong na une u drok.
Ki la kyntu ïa ka Sorkar ban wengnoh ïa ki khar metor bad ai jaka ïa ki ha kane ka jaka, nangta ruh ki la pan ruh ïa ka surok sha surok them bijoy ban lait na ka jingkynrei kiba khaïi bad dih drok.
Ha kajuh ka por kiba die madan ki la pynpaw ruh ka jinglynngoh ba ka sorkar ka thmu ban phah ïeng noh ïa ki bus na katei ka jaka ïeng kali kaba don ha them
Ïew Mawlong sha ki thaiñ Laimer da kaba ki la ong kan long kaba eh shibun ïa ki nongleit nongwan khamtam kiba wan naduh na nongkyndong kiba wan sha Ïewduh.
“Kumno ka sorkar kam pyrkhat lem na ka bynta ki paidbah khamtam kito kiba ju wan ïew wan hat manla ka sngi khamtam ki nongrep kiba wanrah la ki mar bad hadien ba ki la dep pat la ki kam ki hap sa ban shong kali na Ïew Mawlong shaduh Laimer kaba mut ba kin hap ban pynlut arshah lai shah ïa kaei kaba ki la kamai baroh shi sngi,” ong kiba die madan.
Shuh shuh na ka liang jong ki, ki la kyrpad ïa ka sorkar ba kadei ban da pyrkhat bha haba shim ïa kano kano ka rai ha kaba ïadei bad ka jingeh jong kiba die madan naba kane ka long ka mat jong u luk u lak bad ki paidbah kiba duk kiba kamai mynsngi bad bam pat da mied, hynrei ka sorkar ha ka jaka ba kan ïarap ka ñion pynban ïa ki paidbah.
“Kum kaei kane ka sorkar ha ka jaka ba kan ïarap ïa kiba duk kiba rangli hynrei ka khyrwit pynban da kaba ñion beiñ ïa ki,” pynpaw biang kiba die madan.