Haduh kumba 43000 ngut ki nongtrei kam Sorkar ki don ïa ka account tulop bad ka SBI

Shillong, Naitung 23 : U Myntri Rangbah ka Jylla Conrad K Sangma mynta ka sngi ula ïashimbynta ha ka jingïasoi ïa ka Memorandum of Understanding (MoU) ba la pynthymmai kaba long hapdeng ka Sorkar Meghalaya bad ka State Bank of India (SBI) na ka bynta ka State Government Salary Package (SGSP) lane ka song tulop ka Sorkar jylla, kaba pyni ïa ka sienjam ba kongsan ha kaban kyntiew ïa ka bha ka miat ki nongtrei lyngba ka jingpynbun ïa ki jingai jingshakri ki bank bad ka jingshngain ha ka pisa pilain.
Kane ka soskular bala pynthymmai ka bujli noh ïa ka MoU bala ïasoi kham mynshuwa ha u snem 2012 bad ka wanrah ïa ka rukom siew tulop ba kham bniah na ka bynta ki nongtrei Sorkar. Ka ai ïa bun ki jingmyntoi bala nang pynheh, kynthup ïa Insurance ba heh, ka jingpynjynsur haba shim ram, ki jingshakri bala pynjanai ïa ka digital banking, ki jingmyntoi ba ai ki bank ïa ki bahaïing hasem, bad kiwei kiwei. Ïa kine ki jingmyntoi lah ban ïoh da kiba don ïa ka SGSP account bad ki nongtrei Sorkar ba dang shu dep thung thymmai.
Haba kren ha ka jingïalang, u Myntri Rangbah Conrad K Sangma ula ong ba ka Sorkar ka kut jingmut hok sha ka bha ka miat jong ki nongtrei da kaba pynthikna ba kin ïoh ïa ki jingshakri ba kham bha na ki bank. Ula pynpaw ba kane ka jingïatehlok ba la pynthymmai ka pyni ïa ka jingpyrshang ba khlem sangeh jong ka Sorkar ban nang pynbha ïa ka jingai jingshakri ba lah ban ïoh da ki nongtrei haba kyntiew ïa ka jingïadon bynta lang ha ka kam pisa pilain bad digital banking ha baroh kawei ka Jylla.
Kat haduh ka 30 tarik Jylliew, 2026, palat ïa ka 43,000 ngut ki nongtrei Sorkar ki don ïa ka account tulop bad ka SBI hapoh ka SGSP, kaba kot jan 71% ha ka jingdon ki nongtrei ka Sorkar Jylla. Na kine, palat 33,000 ngut ki nongtrei kila ïoh shim ïa ki ram bapher bapher na ka bank, kaba pyni ïa ka jingsngew shaniah jong ki nongtrei Sorkar ha ki jingai jingshakri ka SBI.
Kane ka SGSP bala pynthymmai ka wanrah ruh ïa katto katne ki jingdonkam bala nang pynbun, kynthup ka jingwanrah ïa ka Rhodium Salary package, ka personal accident insurance ba kot haduh T. 1 klur, ka air accident insurance ba kot haduh T.1.60 klur, group term life insurance, ka jingpynduna haka bai pynleh ïa ki ram shimet, ram shna ïing, pule puthi bad thied kali, RuPay, Visa bad Mastercard debit card, YONO SBI bad kiwei ki jingshakri digital, ka jingphah pisa online ba khlem jingsiew, ki jingmyntoi ban ïoh ki bahïing hasem hapoh ka SBI Rishtey.
U Myntri Rangbah ula ïaroh ïa ka jingsynniang kaba khraw jong ka SBI sha ka jingai bynta lang ha ka kam pisa tyngka ha Meghalaya lyngba ki shnat treikam, ki ATM, ki Custoer Service Point bad ka jingkyrshan ha kaban pyntreikam ïa ki skhim bapher bapher ka Sorkar ha kylleng ka Jylla.