“Set phatok shi jingim” Pyrta ki paidbah ha ka Peace Rally ha shnong Pyndenumsaw

Mawkyrwat, Naitung 21: Kum ka dak jong ka jingpynrem jur bad ka jingpyrshah ïa ki kam pyntriem, ka Dorbar Shnong Pyndenumsaw mynta ka sngi ka la pynlong ïa ka Peace Rally ban pynpaw ïa ka jingsngewsih bad jingbitar halor ka jingshah pynïap dusmon jong ka (L) Snity Wahlang, 56 snem ka rta, ha la u hynmen trai u Bailing Wahlang, 62 snem ka rta, na ka shnong Pyndenumsaw, South West Khasi Hills District.
Ïa ka jingïaid paidbah ne ka Rally la sdang na Madan Dommawleiñ, nangta sha Lawtiehbah, Perjet bad Umsaw Domrisai, bad wanphai biang sha Madan Dommawleiñ kaba long ka jaka pynkut.
Kum ban shu kdew ba ka Dorbar Shnong ka la pynlong ïa kane ka Peace Rally hadien katei ka jingjia kaba sngewsih bad shyrkhei kaba la jia ha shnong Pyndenumsaw ha ka 14 tarik mynta u bnai ha ka por 6:40 baje mynstep, ha kaba ka longkmie ka la duh noh ïa la ka jingim hadien ba la shah dung da ka tari ha la u hynmen trai.
Ha ka jingïaid paidbah, ki nongshong shnong, ki nonghikai bad ki khynnah skul ki la ïa pyrta lang da ka sur kaba shai ban pynrem ïa u nongleh kam runar, da kaba dawa ïa ka jingbishar kaba hok bad ban set phatok shi jingim ïa u Bailing Wahlang.
Shuwa ka jingïaid paidbah, la pynlong ruh ïa ka jingïalang ba lyngkot ha kaba la ai jingkren na ki dkhot ka ïing ka sem jong ka (L) Snity Wahlang ki la ïathuh ïa ki jingjia baroh kata naduh ki por ba la dep bad haduh ka khyllip mat ba u Bailing Wahlang u shim ïa ka jingim jong ka para jong u ka (L) Snity Wahlang. Ym tang kata, ki la kyntu ruh na ka bynta ki paidbah jong ka shnong ba nangne shakhmat ki dei ban long kiba husiar bad phikir ha ka ïaid ka ïeng lada jia ba u Bailing Wahlang un lait na ka jingshah set phatok namar kum u ju long ha ka jingim jong u ba lada don mano mano ba ktah kti ïa u kaba mut ha ka jingmut jingpyrkhat u la buh shun lypa.
Shuh shuh, na ka liang kiba ha ïing jong u Bailing Wahlang ki la dawa ruh na ki bor jong ka aiñ ba da lei lei kim dei ban dang pyllait ïa u namar kumba ka paw ba um don shuh ka mynsiem ïatip lem hynrei u la don ka mynsiem ksuid, kumta dei ban set ïa u shi jingim namar une u runar u la don lypa ka jingthmu sniew ym tang ïa kiba ha ïing hynrei wat ïa ka shnong ka thaw baroh kawei.
U Babu Anderson Syiemlieh uba la mihkhmat ïa ka Executive Committee ka Dorbar Shnong Pyndenumsaw, bad u Bah Plosbor Kharjahrin, Secretary, Environment & Cultural Cell jong ka KSU South West Khasi Hills District ha ka jingkren jong ki ruh ki la bynrap da kaba ong ba kum kine ki jait kam kiba long ka daw jong ka jingshong syier ha ki longïing longsem bad ka shnong ka thaw, kim dei ban ai lad hynrei kum ki paidbad ki dei ban ai ka jingïatreilang ban rad dyngkhong khnang ba kin nym long ka daw ne long maw-jynthut ha ka ïaid ka ïeng jong ki paidbah.
Ïa ka jingïalang la pynïaid da u Bah Koland Marweiñ, Myntri Shnong ka Dorbar Shnong Pyndenumsaw.