Syrtok ki paidbah ba suki shaba palat liam ka jingpyntrei ïa ka surok Maweit-Mawdom

Nongstoiñ, Naitung 20: Ka jingsuki palat liam ban pyntrei ïa ka surok Maweit naduh Mawdom sharum kaba don tang 12 kilometer, ka la pynsyrtok ïa ka leit ka wan ki nongshong ka thaiñ Maweit. Kumba long haduh mynta ka um ktieh ka dap shilynter naduh Mawdom haduh Rangsohlait Umiong, namar ka jingsiang maw ruh ka dang dep tang haduh katei ka jaka.
Ym lah len ba ka jingtrei ka la ïaid shakhmat, hynrei ka jingsuki ka long kaba palat liam, ha kaba ki paidbah ki la kynthoh ruh ba imat u contractor ba shna surok u duna ki kor ki bor kum ki JCB bad kiwei kiwei, ban pynkloi ban pyndep wut wut ïa ka jingsïang rong.
Na ka liang u Bah John Dkhar uwei na ki paidbah nongleit nongwan u la pynpaw ïa ka jingsohsat bad ka jingsyllang ka ïaid ka ieng wat ka bike ruh hateng hateng ka la khyllem bad hap khyllie pat.
U bah John Dkhar ha ka jingïakren bad u nongthoh khubor, u la ong ba kane ka jingsniew palat liam kane ka surok, ka la pynjynjar sat ïa ki nongleit nongwan ka thaiñ Maweit khamtam ki tymmen ki kro bad kiba pang kiba shitom.
Ha ka jaka ban poi tang 30 minit na Nongstoiñ shaduh Maweit, hynrei ka jingsniew palat liam kane ka surok na Mawdom shaduh Maweit, ki kali bad wat ka bike hap ïaid haduh shi kynta shiteng.
Kiba ñiah bike lada ki shong ar ngut ki la hap hiar bun jaka, namar wat tang marwei ruh bun ba la hap ban hiar shwa na ka bike bad hap ban ïaid jan 1 kynta tam tang na Rangsohlait haduh Mawdom, kaba khlem siang maw bad siang rong ruh tang shilliang mynta sa 8 lane 9 kilometer.
Ki nongñiah kali rit kum ka sumo, ki camper bad wat ki nongñiah bos ki la pynpaw ïa ka jingsyllang namar ka jingsniew palat liam kane ka surok, khamtam ha kane ka aiom slap namar ka jingshong um ktieh.
Ki paidbah nongleit nongwan ka thaiñ Maweit kiba bun ki la pynpaw ba ki la tieng ban shong ha ka bos namar I kumba la jan khyllem khyllem ha bun ki jaka.
Kumta, na ka liang ki paidbah nongleit nongwan ka thaiñ Maweit ki la kyrpad ïa u contractor ban pynkloi noh ban pyndep khamtam ban ïoh siang maw noh bad siang rong noh ïa kane surok shilynter.