Mawkyrwat, Naitung 20 : Hadien 16 sngi ba ka la jah na ïing, la lap noh ïa ka longkmie na kawei ka jaka ba long khlaw ba ki ju khot ka Khlaw Pungkse kaba hapoh shnong Jakrem ha ki por kumba 2 baje janmiet da ki briew kiba thmu ban leit wad tit.
Lah ban kdew ba ka longkmie kaba jah ka kyrteng ka Joit Kharlyngdoh, 76 snem karta na ka shnong Jakrem, South West Khasi Hills District ka la kynjoh mynta la 16 sngi naduh ba ka la jah ha 4 tarik u Naitung, 2026 ha ka por kumba 6 baje janmiet bad naduh kata ka por ka khlem wan phai ïing shuh.
Katkum ka jingïathuh jong u Myntri Shnong Jakrem, u bah Pascal Wahlang u la ong ba naduh ba ka la jah, kum ka shnong baroh kawei kam shym la shongthait ban thaw ki lad ki lynti ban wad hynrei kam shym poi shano shano. “Ha ka 15 tarik mynta u bnai, ka paidbah nongshong shnong ryngkat ka jingïatreilang bad ka police department ruh ki la pyrshang ban phah wad ïa ka da kaba phah lyngba ka MLP K9 CID Unit hynrei km shym la urlong namar ka la slem palat ka por”, ong u Myntri Shnong Jakrem. Hynrei dei tat ha ka janmiet jong ka 20 tarik mynta u bnai ha ka por kumba 2 baje ei ei la lap dien ïa ka na kawei ka khlaw ba ki khot ka Krem Motbih Pamske, ong u Myntri Shnong Jakrem.
Katba ha ka tyllong khubor ba la ïoh na u Bah B. Jyrwa, MPS, Superintend jong ki Pulit ka South West Khasi Hills District u la ong ba mynta ka sngi ka 20 tarik u Naitung 2026 ha ka por kumba 4 baje janmiet, u Pascal Wahlang ula pyntip lyngba ka phone sha ki pulit ba la lap ïa ka metïap jong ka longkmie kaba jah ha Khlaw Pungkse ha shnong Jakrem. Mar ïa ïoh jingtip, ka WPSI kong A. Sawkmie, ryngkat bad ka kynhun Crime Scene Unit (CSU), ka la leit mardor sha katei ka jaka.
“Hadien ba la poi ha ka jaka, la pynlong ïa ka spot inquest halor ka metïap, bad la ithuh ïa ka lyngba ki jaiñ phong bad da ka jingpynithuh u khun jong ka hi, u Remingstone Kharlyngdoh”, ong u SP. Kumta, na ka liang ka Crime Scene Unit ka la khmih bniah bad talasi pura ïa ka jaka ba la lap ïa ka metïap, hynrei ym shym la lap satia ïa kano kano ka sabut kaba lah ban pynshisha ïa kano kano ka kam runar. Shuh shuh la pynkhreh ruh ïa ka rough sketch map jong ka jaka ha ka jingdonlang ki sakhi bad la ring dur video ïa baroh ka jingïaid jong ka jingtohkit lyngba ka eSakshya App.
Ym slem hadien ba la pyndep ïa baroh ki kyndon aiñ, u bah Jyrwa u la ong ba la rah ïa ka metïap da ka kali pulit sha Civil Hospital, Mawkyrwat, bad la aiti sha u Medical & Health Officer ryngkat bad ka jingkyrpad ban leh ïa ka post-mortem examination ban lap ïa ka daw bad ka por ba la khlad ka. Hynrei, katkum ka jingpyntip jong u Medical & Health Officer, u la ogn ba yn pynlong ïa ka post-mortem examination tang ha ka 21 tarik u Naitung, 2026.
Haduh kata ka por, la buh ïa ka metïap ha ka morgue jong ka Civil Hospital, Mawkyrwat.
