Shillong, Naitung, 23: Ka jingpakhang lynti ba arsngi jong ki seng bhalang bapher bapher ïa ki ophis treikam ka MeECL ha Williamnagar ka la ïaid beit khlem kino kino ki jingpynthut.
Ka jingdawa jong ki seng bhalang ka long ba ki bor ba halor ka MeECL ki dei ban thung briew shuh shuh khnang ba kane ka tnad kan lah ban pynbiang bor ding ha ri lum Garo. Nalor kane ban pynsangeh shisyndon ïaka jingsam bording ba noh shilliang khamtam eh ha kaba pynkynriah kam ïa ki nongtrei jong ka.
Ki seng ki la pynpaw ba ki don bun ki nongtrei ha ki kyrdan Class III bad IV la pynkynriah noh na Garo Hills sha Khasi Hills katba ym shym la wanrah wat tang uwei u Khasi ruh sha ri lum Garo. Wat lada don ruh tang shisnem kila ïoh ban kynriah biang sha Khasi Hills. Ki la pynpaw ba h snem 2020-21 ki la don bun ki jingthung kam ha Khasi Hills hynrei tang iwei i Garo ruh ym shym la ïoh rung. Nalor kata ym lap ban don wat tang iwei ruh i nongtrei Garo ha ophis jongka MeECL ha Lum Jingshai.
Na ka por sha ka por la ai jingthoh bad la wad ruh da ka RTI halor kane ka jingleh shilliang khmat hynrei ym don satia ba patiaw ne shim khia. Na kata ka daw ki seng bhalang kim banse ban pynlong da ki jingïakhih .
