Kynnoh u Bernard ba shet kylla ka sorkar ïa ki Nongtrei GHADC ba pynslem siew tulop

Shillong, Naitung 19 : U MDC ka BJP na ka Tura Constituency u Bernard N Marak ula kynnoh ba ka sorkar ka la shet kylla ïa ki Nongtrei ka Garo Hills Autonomous District Council (GHADC) bad ka ñiew beiñ ruh ïa ka bor bad iktiar jongka GHADC da kaba pynslem ban siew ïa ka tulop jongki.
U Marak ula ong ba ka EC ba la ïalam da ka NPP haba ka la wan ha ka bor ka la kular ban wanrah ki jingpynkylla kynthup ruh ïa ka jingsiew thikna ïa ka tulop ki nongtrei bad ban siew dep ruh ïa baroh ki hok ba ki nongtrei ki dang dei ban ïoh.
“ Hynrei kita ki jingkular baroh mynta ki long hasuiñ” ong u Marak.
U la ong ba ma u shimet ula shim khia ïa kane ka kam ban ïakren bad ki bor khmih ka tnad District Council Affairs jongka sorkar jylla ha kaba ula kyntu ban pyllait noh kloi ïa ka tulop jongki.
“ Ym don hok ban pynjynjar ïa ki nongtrei ka GHADC bad ki khun ki kti jongki da kaba pynslem ban siew ïa ka tulop bad kiwei kiwei ki jingsiew ba ki dei hok ban ïoh” ong u Bernard.
U la kynnoh ba kita ki jingpynkylla ba la wanrah da ka sorkar ki long pynban mar khongpong.
Kita ki jingkular jong u Myntri Rangbah ban wanrah ki jingpynkylla bad jingpynkhlaiñ ïa ka GHADC ki la long kiba pulom bad la i kumba ki pyntroiñ shuh shuh ïa ka bor bad iktiar jongka Council da kaba shu shaniah tylli beit ha ka sorkar jylla. Kane ka jingpynslem ban pyllait pisa ne tulop ka pyni da shisha ïa kita ki jingpynkylla” ong u Marak.
Nalor kane ula kynnoh ruh ïa ki jingshalan beaiñ ïa u dewiong bad u maw na ri lum Garo da kaba ai da ki kot ki sla thok naduh ki challan bad kiwei kiwei ki kot ba ki trok kin ïoh ban kit ïa u dewiong bad maw ban shalan sha Bangladesh.
Lada kine ki ïai long kumne kan wanrah ka jingduh nong kaba khraw bha ïa ka jylla bad ka council na ka khajna ba dei hok ban ïoh bad kumta u dawa ba dei ban thung da ka jingtohkit ba laitluid halor kane ka kam.
U la ong ba ka EC ka la mynjur ïa ka resolution halor ka jingkyrpad jongu ban pynthikna ïa ki kot ki sla naduh ki TNT bad ki Transit Pass bad kumjuh ruh ki Challan na ka bynta kito ki trok ba kit ïa u dewiong bad u maw hynrei u ong kane ka shu sah kut tang ha ka jingmynjur khlem kano kano ka jingpyntreikam.
Kumta u dawa ba ka DCA ka dei ban pyllait noh mardor ïa ka pisa ban pynthikna ba ki nongtrei ka GHADC ki ïoh ïa ka tulop jongki ha ka por kaba biang khlem kano kano ka jingpynslem.
U la ong ba kane ka jingpynslem ka long kum ka jingpynkhein ïa ka jingïasoi ïa ka sorkular hapdeng ka sorkar bad ka Council bad ka long ruh kum ka jingïuhroit ïa ka riti synshar kat kum ka Sixth Schedule.
Ki paidbah ka ri lum Garo ki donkam ban ïoh ïa ka sorkar kaba burom ïa ki jingkular jong ka, kaba burom ïa ka iktiar jongka GHADC bad kaba trei halor ka jingkhuid jingsuba namar ki jingkular ki donkam ban long ruh bad ki kam ym dei tang ki jingkular kai” pynkut u Marak.