Ha ka Dorbar Synrai yn wanrah ka Sorkar ïa ka Resolution ban khang dam ïa ka jingthmu tih Uranium : CM

Shillong, Naitung 17 : Ka Sorkar Jylla kan wanrah ïa ka resolution ban pyrshah ïa ka jingtih uranium ha Jylla ha ka Dorbar Synrai jong ka ïing Dorbar Thaw Aiñ ka Jylla, ka ban long ha u bnai Nailar, ong u Myntri Rangbah Conrad K Sangma ha ka sngi Thohdieng.
Haba kren sha ki lad pathai khubor, u Conrad ula pynpaw ba ka ïing Dorbar kan hap ban ïakynduh hashuwa ka 27 tarik Nailar ban pynbiang ïa kaei kaba la buh da ka Riti Synshar ka Ri kaba long hynriew bnai hapdeng artylli ki dorbar.
“Hooid, ïa ka resolution yn sa wanrah ha ka Dorbar Synrai ban wan jong ka ïing Dorbar Thaw Aiñ, ka ban long ha u Nailar. Ka 27 tarik Nailar ka dei ka sngi kaba dei ban khot ïa ka Dorbar namar ka hynriew bnai kan kut ha ka 27 tarik u Nailar” ong u Myntri Rangbah.
U Conrad ula ong ba ha kane ka dorbar Synrai jong ka ïing Dorbar, ka Sorkar kan sa wanrah ïa kane ka resolution.