Aiti ïa ka jingtohkit shawei kurup ïa ki CCTV halor ka jingiap ka khynnah ha Nongpoh hukum ka HC

Shillong, Naitung 17 : Ka ïing Bishar High Court ha ka sngi Palei ka la hukum ban aiti noh shawei ïa ka jingtohkit bad ban kurup ïa ki video CCTV haba ïadei bad ka jingkynnoh dkhat jubor ka khynnah kynthei ïala ka jingim hadien ka jingshah tohkit hapoh ka Women Police Station, Nongpoh.
Haba shong bishar ïa ka mukotduma ba la mudui da u Anius Majhong, ka Chief Justice Revati Mohite Dere ka la bthah ïa u Superintendent of Police (SP) ka Ri-Bhoi District ba un “kurup noh mardor ïa ki video jong ki CCTV camera kiba don hapoh bad shabar ka Police Station jong ka 22 tarik Jylliew, 2026 naduh ka por12 baje mynsngi haduh 11 baje mynmiet”.
ïa kine ki video dei ban kurup hapoh ka panchnama bad ban thep ïa ki hapoh ka jaka ba shngaiñ.
ïa kane ka mukotduma la register hadien ba u Kni jong kane ka khynnah ula kynnoh ba ki Pulit ka Women Police Station kila pynkheiñ ïa ka hok longbriew jong kane ka khynnah ha ka por ba ki pynlong ïa ka jingtohkit.
Haba kdew ba ki juh ki Heh Pulit jong ka Police Station ki tohkit ïa ka ejahar, u Amicus Curiae S Sen ula pynpaw ba “ki Ophisar kiba don hapoh ka jingbishar bad ba shah kynnoh don bynta ha ka jingdkhat jingim kane ka khynnah, ki dei hi na kajuh ka police station”.
Haba pdiang ïa kane ka jingpynsngew, ka ïing Bishar kala bthah ïa u SP ban “aiti noh ïa ka jingtohkit sha ki police station ba marjan bad ban bynshet ïa ka jingtohkit ha ki Heh Pulit ba la heh kyrdan”.
La bthah ruh ïa u SP ba un “khmih bniah hi shimet ïa ka jingtohkit” bad ban ïai don ha ïng Bishar ha ka sien shong bishar ban wan.
Ka ïing Bishar ka la hukum ba ki Ophisar jong ka Women Police Station ha Nongpoh, kiba shah kynnoh, kim dei satia ban ïadon bynta bad ka jingtohkit halor kane ka jingjia bad kim dei ruh ban leit ïakynduh ne ïakren ïa kiba haïing jong ka lanot la ka long ha kano kano ka rukom ruh”.
U DCPO, Nongpoh uba la wan mih hi da lade, la bthah ba un file ïa ka affidavit ban pyntip la ka la don ne em ka jingpyntip sha u halor ka jingwanrah ïa ka khynnah sha ka Police Station.
Ka Sorkar Jylla, bala mihkhmat da u AAG K Khan, ka la aiti ïa ka kaiphod na ka DSP, Women Police Station, Nongpoh, ka ban sa file ha ka dur jong ka affidavit. ïa kane ka mukotduma yn sa shong bishar biang ha ka 29 tarik Naitung, 2026.