Shillong, Naitung 17: Ka Raid Laban Sports, Social and Cultural Organisation (RLSSCO) kala rakhe ïa ka lyngkhuh sngi ïap ba 191 jong u Syiem Tirot Sing uba dei u khla wait uba ïakhun laitluid pyrshah ïa ka sorkar phareng.
Ïa kane ka jingrakhe ïa ka lyngkhuh sngi ïap u Tirot Sing Syiem la pynlong ha Warrior Memorial Garden kaba don u Motdur ba shi rynieng jong u Tirot Sing Syiem ha Kench’s Trace Raid Laban, Shillong.
Ïa kane ka jingrakhe la sdang da ka jingrwai bad bud pat sa ka jingbuh syntiew ha u mot dur jong u khla wait, hapoh ka jingialam jong u Myntri Sorkar ba bat ïa ka tnad Arts and Culture u Bah Sanbor Shullai.
Ha kane kajuh ka sngi la sam ruh ïa ki jingbam tynrai bad ki jingdih ban pyn pyngat sha baroh kiba la wan ban ïa shim bynta bad la sam ruh ïa ki jingbam sha ki khynnah baduk, kynthei bad shynrang jong ka 19 South Shillong Constituency.
Ha kane hi kajuh ka sngi, Ka BJYM Shillong City District ka la rakhe ïa ka lyngkhuh sngi iap ba 191 jong U Tirot Sing Syiem, kaba ai burom ïa u nongïakhun laitluid ba pawnam uba ka jingshlur bad ka jingïeid ri jong u ka ïai bteng ban ai mynsiem ïa ki pateng ha kylleng ka jylla Meghalaya.
Ka prokram kaba la sdang da ka jingleh burom da ki syntiew sha une u nongïalam, la don ruh ka jingsam khusnam jong ka Online Reel Making Competition kaba la pynlong halor ka phang “Inspiration of U Tirot Sing to Youths in Taking Up the Nation First Policy.”
Palat shispah ngut ki nongïashim ïa ki reel kiba ai mynsiem na ka bynta kane ka jingïakob, ha kaba ki reel jong u Rishotbaskhem Kharlyngdoh, u Lasanshwa Rani bad u Kamwadathrang Rabon ki la ïoh khur ïa ki lai tylli ki khusnam ba nyngkong.
Ïa kane ka jingrakhe ba donburom bad kaba ai mynsiem la ïa lang da u Dr. Bernard Lyngdoh, u Neurosurgeon ba pawnam jong ka Jylla Meghalaya, kum u Kongsan, ha ryngkat ki nongïalam ba rangbah jong ka Bharatiya Janata Party bad ka kynhun jong ka Yuva Morcha.
