Shillong, Naitung 15: Ka ïawer ka Care for India Foundation ka la ïawer ïa ki paralok ban pynkhlaiñ ïa ka jingkoit na ka jingdih buaid bad kumno ban ïarap pynkhlaiñ bad jingpynrung biang ïa ki briew shimet kiba ngop ha ki jingpang dih buaid sha ka imlang sahlang ha ka jylla Meghalaya.
Ha ka 14 tarik Naitung 2026, ka Care for India’s Reintegration Project, Shillong, ha ryngkat ka jingïatreilang bad ka Drug Reduction, Elimination & Action Mission (DREAM Mission) jong ka Sorkar Jylla, ka la khot ïa ka jingïalang jong ki paralok kaba la ai kyrteng “Ki jingshemphang shaphang ka jingdih buaid: Ka jingpynkhlaiñ biang ïa ka jingïalang.”
Ka jingïalang ka la wanrah lang ïa ki nongmihkhmat na palat 20 tylli ki seng treimon sngewbha, ki jaka pule kiba pynshong nongrim ha ka jingngeit, ki jaka pynkhlaiñ, bad ki tnad sorkar ban ïamir jingmut kumno ban pynkhlaiñ ïa ki lynti ban ïoh biang ïa ka jingkoit jingkhiah bad ka jingpynrung biang ïa ki briew shimet kiba ngop ha ki jingpang bampong.
Ka jingïalang ka la long kum ka rynsan ban pynroi ïa ka jingïakren, ban ïasam ïa ki jingshem ha ka kam, bad ban pynkhlaiñ ïa ka jingïatreilang hapdeng ki nongshim bynta kiba trei na ka bynta ka jingpynbha bad ka jingpynïasoh biang ïa ka imlang sahlang ha Meghalaya.
Ki jingïakren ki la long halor lai tylli ki jingthmu ba kongsan, Ka Jingpynpaw ïa ki Jingshisha ha ka Kyrdan: Ka Dr. Jasmine Mary Lyngdoh ka la ïasam ïa ki jingpeit bniah ba kordor ha ka kam bad ka la ai ïa ka jingshemphang kaba jylliew jong ka ban pyni ïa ki jingeh kiba lah ban leh kiba ki briew shimet ki ïakynduh na ka jingpynbha pat sha ka jingim ha ka imlang sahlang.
Ka Jingithuh ïa ki jingduna bad ki lad ki lynti: U Bah Francis Kharshiing, u Dr. U Cyril Tirkey, bad u Bah B.L Nari ki la ai jingmut shaphang ki jingduna kiba la don lypa ha ki rukom phah sumar, ka jingbteng jong ka jingsumar, ka jingkyrshan ha ka kamai kajih, bad ka jingpynrung biang ha ka imlang sahlang, katba ki tyrwa ïa ki lad ki lynti na ka bynta ka jingïatreilang kaba khlaiñ hapdeng ki tnad.
Pynkhlaiñ ïa ka jingïatreilang jong ki nongshim bynta ba bun: Ki nongïashim bynta ki la mynjur lang ban thaw ïa ka kynhun ïatreilang kaba kynthup ïa ki seng treimon sngewbha, ki tnad sorkar, ki jaka pynbha ïa ki briew, bad ki seng kiba pynshong nongrim ha ka jingngeit ban pynkhlaiñ ïa ka jingïatreilang bad jingkyrshan ïa ki jingthmu ban pynbha pat. Ka Care For India kan shakri kum ka tnat pynïaid na ka bynta kane ka forum ha u snem ba nyngkong jong ka, ha kaba ïa ka jingïalang jong ki paralok ban wan la buh ban pynlong ha ka New Hope De-addiction Centre ha u bnai Risaw.
Haba kren ha kane ka sngi, u Bah Bob Jacob jong ka Care For India u la kynthoh, “Kane ka jingïalang ka pyni ïa ka jingkyrmen bad jingthmu ba ngi ïasam lang-ba ka jingkoit jingkhiah kam dei ka jingkut jong ka lynti, hynrei ka jingsdang jong ka jingim kaba la ban im da ka burom, ka jingthmu, bad ka jingkyrshan jong ka imlang sahlang kaba sumar.”
Ka jingïalang ka la pynkut da ka jingkular kaba thymmai na baroh ki nongshim bynta ban ïatreilang ban tei ïa ka mariang kaba kynthup lang, kaba ïadei, bad kaba pynbha ban kyrshan ïa ka jingpynbha pat kaba janai, ka jingpynïasoh biang ïa ka imlang sahlang, bad ka jingpynbha ïa ka jinglong jingman jong ki briew shimet kiba shah ktah ha ki jingpang pyndonkam drok ha kylleng ka Meghalaya.
