Sha u CM thoh u Bah AL Hek ban ai jingithuh ïa ki baroh arngut kum ki riewshlur

Shillong, Naitung 15 : U MLA ka Pynthorumkhrah, Bah AL Hekhynne ka sngi Balang u la pyntip ba u la dep ban thoh sha u Myntri Rangbah ka Jylla Conrad K Sangma halor ka jingjia ba sngewsih ha Lapalang kaba la shim noh ïa ka mynsiem jong ki lai ngut ki nongbylla bad arngut kiba leit ban ïarap.
Haba kren bad ki lad pathai khubor, u Bah AL Hek u la ong ba kine baroh kiba khlad ki dei na ka longiing kaba duk bha bad ki dei ruh kiba pyndap ïa ka iing ka sem. Shuh shuh u ong ba ka jingduh kaba khraw ka dei ïa ki arngut ki samla kiba la mad lang ïa ka jingjia ba sngewsih katba ki dang leit ïarap.
U Bah Hek u la ong ruh ba u la kyrpad ïa u Myntri Rangbah ba ym dei eh tang ban siew bai luksan hynrei ruh ban ai ka jingithuh ïa ka kam riewshlur jong ki.
“Nga la kyrpad ïa u Myntri Rangbah ba ym dei eh tang ban siew bailuksan hynrei ruh ban ai ka jingithuh ïa ka kam riewshlur jong ki. Dei ban ai ka jingithuh ïa ka kam shlur jong ki, la ka dei da ka khusnam ne ka jingai sngewbha, khnang ban pynshlur ïa kiwei pat ba kin mih shakhmat ban jingïarap ïa ki para briew,” ong u Bah Hek haba kren bad ki lad pathai khubor.
Haba kren pat halor ka jingong jong u Myntri Rangbah ban phah tohkit halor katei ka jingjia ha Lapang kaba la shim haduh san ngut ki mynsiem briew, na ka liang u Bah AL Hek u la ong ba kano kano kaba leh beain dei beit ban leh katkum ba shah ka kam.