Shillong, Naitung 14: U Myntri ka Sports ka sorkar jylla u Bah Wailadmiki Shylla, u la ong ba ka sorkar jylla ka la buh jingïarap pisa na ka bynta ki Synjuk ïalehkai ne ki sports association kiba kwah ban phah ïa ki nongïalehkai jong ki sha shabar na ka jylla na ka bynta ban ïoh jingtbit bad jingïoh jinghikai shuwa ka National Games kaban long ha ka jylla ha u snem 2027.
Haba kren sha ki lad pathai khubor, u Wailad Shylla u la ong ba kane ka jingïarap kam dei kaba pynbor, hynrei ka shong ha ka rai jong ki association.
“Lada ki sngew ba ka jingïoh jingïalehkai shabar ka donkam, ki lah ban pyndonkam ïa ka pisa. Lada kim donkam, ki lah ban pyndonkam ïa ka pisa na ka bynta kiwei pat ki jingdonkam jong ki,” u la ong.
U la ban jur ba ka jingïoh jingïalehkai bad ki nongïalehkai kiba kham tbit ka long kaba kongsan ym tang ha ka jingpynkhreh hynrei ruh ha ka jinglah ban pyni ïa ka jingïalehkai kaba kham paka ha ka por jingïakhun.
“Ka jingïoh jingïalehkai shabar ka ïarap ïa ki nongïalehkai ban ïakhun pyrshah ïa ki nongïalehkai kiba kham tbit bad don ha ka kyrdan kaba kham shajrong, bad kane ka long kaba kongsan bha,” u la ong.
Halor ka jingpynkhreh ïa ka National Games, u Myntri u la ong ba ki kam ki dang ïaid shakhmat bad ka sorkar ka ngeit skhem ba shuwa u Nohprah ne Kyllalyngkot jong u snem ban wan yn lah ban pyndep ïa baroh ki jingtei.
U la ïathuh ruh ba katkum ka jingkheiñ kaba dang thymmai, ka mang tyngka na ka bynta ka National Games ka la poi kumba 600 klur tyngka.
