Shillong, Naitung 14 : Ka kynhun Team Revolution Mixed Martial Arts hynin ka sngi ka la pdiang burom ïa ki rang bad thei ïa kura ka jylla Meghalaya kiba la khur takma ksiar bad Rupa ha ka lympung ïalehkai Kickboxing OFC-4 Late Mohan Sonowal Trophy Champion Team Trophy ba la pynïaid da ka Octagon MMA Gym kaba la long ha North Lakhimpur, Assam ha ka 9 haduh 11 tarik mynta u bnai Naitung 2026.
Ha kane ka kynti ka kynhun Team Revolution ka la phah 10 ngut ban ïa shim bynta bad na napdeng kine ka 10 ngut, ki la ïoh khur 4 tylli ki takma Ksiar, 2 tylli ki takma Rupa bad kawei ka takma rnong.
La pdiang burom ïa kine kiba la wan phai sha Nongbah Shillong da u nongseng ïa ka Team Revolution u Bah Sam Lyngdoh bad ka kynhun ha jaka ai jinghikai ha Lumdiengsoh, Shillong.
Haba kren sha ki lad pathai khubor ha ka janmiet jong ka 13 tarik u Naitung 2026, ki samla ki la pynpaw ïa ka jingsngewkmen kaba khraw ba ki la ïoh ban ïa shim bynta ha kane ka lympung ïalehkai da kaba ïoh rah ïa ki takma ksiar wat la ka dei ka sien ba nyngkong ki leit ïa shim bynta ha kane ka lympung ïa kura kiba wan ïa shim bynta na kylleng ki jylla ka India.
Ki samla kiba ïoh khur takma ksiar ha katei ka lympung ïalehkai ki kynthup ïa u Vilfredo Nongtnger, 17 snem ha ka kyrdan 48 kilo, u Ajam Chakma, 18 snem ha ka thup ba 65kilo.
Nangta u Ignatius nongbri, 19 snem ha ka thup ba 52 kilo bad u Skhemborlang Lyngdoh Nonglait, 18 snem ha ka thup ba 52 kilo, katba ka Daniella Mylliemngap ïa ka takma rupa ha ka thup ba 60 Kilo bad ka Paokhanmang Doungel, 18 snem ha ka thup ba 56 kilo.
