Ia ka Entry-Exit Point ngi lah ban pynïeng noh mynta ne la shai hynrei kaba eh dei ban pyntreikam : CM

Shillong, Naitung 13 : U Myntri Rangbah ka jylla, Conrad K. Sangma, u la ong ba kam don jingeh satia ban pynïeng ïa ka Entry-Exit Point ha Umling, hynrei ka jingeh kaba khraw ka long ban don ïa ka kyndon aiñ kaba biang ban pyntreikam ïa ka rukom peitngor bad lum jingtip ïa kiba rung bad mih na ka jylla.
U Myntri Rangbah u la kren ïa kane haba jubab ïa ka jingkren jong u Myntri ka tnat Tourism ka sorkar jylla u Timothy D. Shira, uba la ai jingmut ban don da ka Tourist Registration Centre ha Umling. Kane ka jingkren ka wan hadien ka jingïapyrshah ïa ka jingthmu ban tei ïa ka Food Court ha Umling bad ki jingdawa ban don noh ïa ka Entry-Exit Point ban peitngor ïa ka jingwan rung ki briew sha ka jylla.
Haba kren sha ki lad pathai khubor, u Myntri Rangbah u la ong, “Kam don jingeh ban pynïeng ïa ka Entry-Exit Point. Ngi lah ban pynïeng ïa ka mynta hi ne lashai ruh. Hynrei ka jingkylli kaba kongsan ka long la ngi don neem ïa ka kyndon aiñ kaba lah ban pyntreikam ïa ka rukom talasi kaba dei ban long.”
U la ong ba ka jingeh kaba shisha ka dei ha ka rukom pyntreikam ïa ka aiñ, ym ha ka jingtei ïa ka jaka.
“Kata ka dei ka jingeh kaba ngi mad mynta. Ngi kyrmen ba da ka jingpynkylla ïa ka Meghalaya Residents Safety and Security Act (MRSSA), ngin sa lah ban pyntreikam ïa kane ka rukom peitngor,” la ong u Conrad.
U Myntri Rangbah u la ban jur ruh ba tang da kaba pynïeng ïa ka khyrdop kam lah satia ban pynbeit ïa ka jingeh.
“Ka jingtei ïa ka khyrdop kam dei ka mat. Kaba kongsan ka long kumno yn pyntreikam ïa ka jingtalasi bad kaei ka rukom jingïoh jingtip kaba yn pyndonkam. Lada shu plie ïa ka khyrdop bad buh briew tang ban shong hangta, kata hi kan ym lah ban pynbeit ïa ka jingeh,” u la ong.
U Conrad Sangma u la mynjur ruh bad ka jingai jingmut jong u Myntri ka tnat Tourism ka sorkar jylla ban don ïa ka Tourist Registration Centre ha Umling, hynrei u la ong ba ka jingïaid beit jong kane ka projek kan shong eh ha ka jingïoh ïa ka bor aiñ ban pyntreikam.
U la ong ba ka Sorkar ka dang trei halor ka jingpynkylla ïa ka MRSSA, kaba long ka sienjam kaba donkam ban pynthikna ba ka Registration Centre bad ka Entry-Exit Point kin treikam katkum ka jingthmu jong ka Sorkar.