Yn hap noh ka Shillong Contonment hapoh ka jingtreikam ka Building Bye-Law
Hadien 37 snem jong ka jingap khmih lynti
Shillong, Naitung 13: Hadien 37 snem ka jingap khmih lynti, ki nongshongshnong ka Shillong Contonment kin sa hap noh hapoh ka jingtreikam ka Building Bye-Law, ong u Myntri Sorkar u Bah Sanbor Shullai ha ka sngi Nyngkong.
Ha ka kyrwoh, u Bah Sanbor ula pynpaw ïa ka jingsngewhun halor kane ka jinglong jingman bad kynnoh ïa ka jingpynslem sha ka notification u snem 1989 bala pynmih da ka Sorkar Congress.
“Ki nongshongshnong ka Shillong Contonment ki lah ban shah pynhap noh hapoh ki kyndon treikam jong ka Building Bye-Law hadien ka jingap ba 37 snem.Ha u snem 1989, ka Sorkar Congress kala pynmih ïa ka jingpynbna baka F.S.I floor space index ka long 0.5 bad naduh katei ka por, ki nongshong shnong kila mad ïa ka jingjynjar” ong u bah Sanbor,
Ula ai burom ïa kane ka jingiaid shakhmat ka kam sha ka jingpyrshang ba khlem sangeh jong ka Shillong Contonment Board bad ki Ophisar ka Jylla.”Nga ai khublei ïa u President ka Shillong Contonment Board u Rajesh Verma, u CEO barim ka Board Ayush Maurya, u Word Member u Bipen Pradhan, Engineer na ka Contonment Board bad MUDA namar ka jingpyrshang khlem sangeh ban pyntreikam ïa ka bye-law” ula pynpaw.
U Bah Sanbor, uba la leit ïa shim bynta ha ka jingialang ka Board kum u dkhot ba shah khot sngewbha, ula ïathuh ba ka jingialang kala ïatai bniah bha ban weng ïa ki jingeh kiba don hakhmat.
“Kum u dkhot ba shah khot sngewbha jong ka Board,Nga la ïa shim bynta ha bun tylli ki jingialang jong ka Contonment Board.Don ki por ba ki jingialang ki neh palat ïa ka phra kynta khnang ban pynthikna ba kan nym don ka jingiatakhuh kam bad ka Sorkar” ula ong.
Ula ai jingiaroh ruh ïa ka jingleit buddien jong ki Nongtrei ka Sorkar sha New Delhi dang shen.
Kat kum ka jingong jong u, ïa ka draft building bye-law la pynmih ha ka Gazette notification ba 3 tarik Naitung, 2026 da ka Ministry of Defence.Ka notification ka khot sngewbha ïa ki jingai jingmut bad ki jingpyrshah hapoh ka 30 sngi.
Ban pynkloi ïa ka jingai jingmut u paidbah, u Myntri ula iathuh ba un sa lum ïa ka jingialang bad ki nongshongwai haki sngi ban wan khnang ba yn lah ban phah ïa ki jingai jingmut jong ki sha ka Ministry ha shuwa ka 3 tarik Nailar.