Naduh ba sdang ngi la ong EM ïa ka kam tih Uranium ha ka jylla, pynpaw biang u Conrad

Shillong, Naitung 13 : U Myntri Rangbah ka jylla, Conrad K. Sangma, u la pynskhem biang ba ka Sorkar Meghalaya kam pdiang satia ïa ka jingthmu ban tih Uranium ha ka jylla.
Haba jubab ïa ki jingkylli jong ki lad pathai khubor, u Conrad Sangma u la ong ba ka nongrim jong ka Sorkar halor kane ka mat ka la long kaba shai naduh kaba sdang bad kam shym la kylla.
“Nga la ong bunsien bad ka Sorkar ruh ka la pynpaw shai ba ngi la ong ‘Em’ ïa ka kam tih Uranium ha ka jylla Meghalaya,” la ong u Myntri Rangbah.
Ka jingkren jong u Myntri Rangbah ka wan hadien ba ki kynhun sengbhalang bad ki paidbah ha ki katto katne ki thaiñ ki dang ïai pyrshah jur ïa kano kano ka jingthmu ban shah ïa ka kam tih uranium ha jylla.
U Myntri Rangbah u la ban jur ba ka Sorkar jylla ka dang ïaineh ha ka rai jong ka bad kan ym ai jingbit ïa kano kano ka jingtyrwa ban tih uranium ha Meghalaya