Dawa ka KSU na u SP ban pynngat hapoh ka POCSO Act ïa u Nurse Shynrang ba kynshleiñ

Shillong, Naitung 13: Ka Khasi Students’ Union (KSU) ka la dawa ban kem mardor ïa uwei u Nurse shynrang ba shah kynnoh ba ki dei kiba kyrshan ïa u ha ka mukotduma ba la leh kynshlein ïa kawei ka khynnah kynthei kaba dang 15 snem ka rta ha NEIGRIHMS.
Ka kynhun jong ka KSU ka la leit ban ïakynduh ïa u SP ka East Khasi Hills ha ka sngi Nyngkong bad aiti ïa ka jingujor ha kaba ïa dei bad katei ka jingjia kaba la kynnoh ba ka la jia ha ka 4 tarik Naitung 2026.
Ha katei ka shithi, ka KSU ka la kynnoh ba hadien ba la puid ia ka appendix, la rah ïa katei ka khynnah rit sha ka observation room bad la iehnoh marwei khlem ka nongsumar ne ki nurse kynthei.
“Ka la sah marwei bad uwei u nurse shynrang uba la leh kynshlein ïa ka hynrei kam lah ban pyrta ne pan jingiarap namar ba ka dang shu mih na jaka puid bad kam don bor shuh”, la ong ka shithi.
Ka union ka la ong ba katei ka khynnah ka la ïathuh ha la ka kmie ïa katei ka jingjia hadien ba la pynkynriah noh ïa ka sha ward.La ujor FIR ha Mawdiangdiang Outpost ha kane ka juh ka sngi, hynrei ka KSU ka la kynnoh ba kam shym la don kano kano ka jingshim khia jong ki pulit.
“Ki pulit kim shym la shim khia ei ei ha ka sngi ba la ai watla ka kam ka long kaba sngewkhia”, la ong ka khubor.Ka KSU ka la kam ba ki pulit ki la leit jngoh ïa ka NEIGRIHMS tang ha ka 6 tarik u Naitung hadien ba ka union ka la tuklar.Ka shithi ka la kdew ruh ïa ka jingïakhih ha ka 7 tarik u Naitung da ki katto katne ki nurse bad ki nongtrei shynrang “ban kyrshan ïa katei ka khynnah,” bad ka la ong ba la ujor ïa ka FIR kaba ar hynrei ïa ki bynta jong ka BNS kiba kham tlot.
Ka KSU ka la kyntu ba dei ban pynngat hapoh ka Section 17 jong ka POCSO Act.
“Ka union ka pynrem ïa ka jingbym lah jong ki pulit ban nym lah ban kem ïa u briew uba la leh ïa kane ka kam.Shuh shuh namar ba um dei na Shillong ka don ka lad ba u lah ban phet rieh”, la ong ka ejahar. Ka KSU ka la bthah ruh ïa ka NEIGRIHMS ban sospon ïa kito kiba donkti khnang ban ïada na ka jingpynthut ia ki sakhi sabut.
Hadien ka jingialang, u general secretary ka KSU u Bah Reuben Najiar u la ong ba u SP u la pynthikna ba ïa kane case ym sa leh sted.
“U SP u la kular ba ki pulit kin pynsted ïa kane ka kam.Ki la shim ïa ka jingkynthoh jong ka lanot ha ryngkat bad ki sakhi…hapoh ar taiew kin sa chargesheet ïa kane ka kam,” u la ong.
U Bah Najiar u la buh jingkylli ruh ïa ka NEIGRIHMS halor ka jingbym don ki nongtrei kynthei.
“Ngi la buh ruh ïa ka jingkylli sha ka bor pyniaid jong ka NEIGRIHMS ka long ba balei ym shym la don ki nurse kynthei haba la rah ia ka khynnah sha kawei pat ka kamra ban peit bniah ne observation… ka ain ka la kdew ruh ba ka nurse kynthei ka hap ban don ha kano kano ka por ba don ka nongpang kynthei”, u la ong.
Ka union ka la ong ba ka la aiti ïa ka shithi sha ka NEIGRIHMS ban pan ïa ka jingkitkhlieh.