SSA 3rd Division 2026: Jop ka Mawlynrei bad ka Umiew Maw U Sam; ïakhaid ka Mawkasiang bad ka Lamlynti

SHILLONG, Naitung 13: Ka lympung Third Division Football League 2026 jong ka Shillong Sports Association (SSA) ka la wanrah biang ïa ka jingïakhun kaba itynnad da lai tylli ki jingïalehkai kiba dap da ki kol hynne ka sngi Nyngkong.
Ka Relegation Zone jong ka Group B ha SSA Ground, la sakhi ïa ka jingïakhun kaba itynnad ha kaba ka Mawkasiang SC bad ka Lamlynti FC ki la ïakhaid mar 3-3 kol.
Ka Lamlynti ka la lamkhmat dang kloi lyngba u Arban Sohshang, uba la pynkhihjar ar sien ha ka minit kaba 13 bad 31. Hynrei ka Mawkasiang ka la jubab shuwa ban jam sha ka por shongthait lyngba u Fivestar Nongkynrih (34’). Nangta u Enrique Sympli u la pynïakhaid ha ka minit kaba 48, bad u Ericnelson Mylliempdah u la buh hakhmat ïa ka Mawkasiang ha ka minit kaba 75.
Hynrei u Ialam Kshiar u la pyllait im ïa ka Lamlynti da kaba pynïakhaid ha ka minit ba khatduh (79’).
Haba phai pat sha ka jingïakhun Super 8, ha MFA Ground, ka Mawlynrei SC ka la mad ïa ka jingjop da 3-0 pyrshah ïa ka Iaitylli SC. Kiba la pynkhihjar na ka bynta ka Mawlynrei ki long u Andrew J. Marboh (15’), u Dawan Mawlong (22’) bad u Ksanborlang Mawlong (75’).
Ka jingïalehkai ba khatduh jong kane ka sngi la sakhi ïa ka Umiew Maw U Sam kaba la pynliem noh ïa ka Pomlakrai SC da 2-1 ha ka Super 8.
Ka Umiew Maw U Sam ka la pynkhihjar mar ïa sdang lyngba u Kularskhem Mawthoh (2’), shuwa ba u Banlamkupar Rynjah un pynjlan arshah ïa ka kol lamkhmat ha ka minit kaba 7.
U Pynkhrehkloi Marbaniang u la pynphai kawei na ka bynta ka Pomlakrai ha ka 53 minit, hynrei ka Umiew Maw U Sam ka la pyneh triang ban khur pura ïa ki lai point.
Ka prokram ïalehkai ha kane ka sngi Ba-ar (14.07.2026 ):
SSA 3rd Division 2026
Jaka: SSA Ground
Por- 12:30 PM
Lapalang SC (vs) Lummawbah SC
SSA U-20 4th Division 2026 Semi Final
Jaka: SSA Ground
Por- 3:30PM
Golflink SC (vs) Mawpdang SC